बीरगन्ज,२७ कातिक । लामो अवरोधपछि जगदम्बा स्टिल उद्योग पुनः पूर्ण क्षमतामा सञ्चालनमा आएको छ। बिहीबार बिहान ६ बजेदेखि उद्योगले उत्पादन सुरु गरेको हो।
उद्योगको विद्युत् आपूर्ति नेपाल विद्युत प्राधिकरण सिमरा वितरण केन्द्रले बुधबार साँझ पुनः जडान गरेको थियो। यसअघि १ अर्ब ६० करोड रुपैयाँ बक्यौतामध्ये पहिलो किस्ता ५ करोड ७२ लाख रुपैयाँ बुझाएपछि लाइन पुनः जडान गरिएको वितरण केन्द्र प्रमुख रुमेश रुपाखेतीले जानकारी दिए।
जगदम्बा स्टिल उद्योगमा करिब दुई हजार मजदुर तथा कर्मचारी कार्यरत छन्। लाइन काटिएपछि उद्योगका आठवटा भट्टी बन्द भएका थिए र उत्पादन करिब ७५ प्रतिशतले घटेको थियो। विद्युत् कटौतीका कारण उत्पादन रोकिए पनि मजदुरहरूलाई सरसफाइ र मर्मतका काममा खटाइएको थियो।
यससँगै, हिमाल स्टिल प्रालिले पनि प्राधिकरणको बक्यौता रकमको पहिलो किस्ता बुझाएपछि आइतबार साँझ लाइन पुनः जडान गराइएको छ। यद्यपि, उद्योगका प्रबन्धक वासुदेव श्रेष्ठका अनुसार, आन्तरिक तयारी बाँकी भएकाले उद्योग तत्काल सञ्चालनमा आउने छैन। सो उद्योगमा करिब चार सय मजदुर कार्यरत छन्।
त्यस्तै, त्रिवेणी स्पिनिङ उद्योगको पनि बक्यौता ३२ करोड ९ लाख रुपैयाँमध्ये पहिलो किस्ता १ करोड १४ लाख रुपैयाँ बुझाएपछि बुधबार दिउँसो लाइन जडान गरिएको हो।
विद्युत् महसुल तिर्ने प्रक्रिया अघि बढेसँगै पर्सा औद्योगिक क्षेत्रका उद्योगहरू क्रमशः सञ्चालनमा फर्किन थालेका छन्, जसले लामो समयदेखि ठप्प भएको औद्योगिक गतिविधिमा पुनः जीवन फिर्ता ल्याएको बताइन्छ।
