जनकपुर,२८ कात्तिक । नेपाली कांग्रेस मधेश प्रदेशका उपसभापति तथा पूर्वमन्त्री वीरेन्द्र प्रसाद सिंहले तत्कालीन प्रदेश प्रमुख सुमित्रा देवी भण्डारी र प्रदेशसभाका सभामुख रामचन्द्र मण्डलद्वारा गरिएको कदमप्रति कडा आपत्ति जनाएका छन्।
उपसभापति सिंहले आफ्नो सामाजिक सञ्जाल फेसबुकमार्फत स्टाट्स लेख्दै यस्तो टिप्पणी गरेका हुन । उनका अनुसार, प्रदेश नेतृत्वद्वारा गरिएका गैरजिम्मेवार, गैरसंवैधानिक तथा अराजक गतिविधिले मधेश प्रदेशलाई अस्थिरतामा धकेल्ने मात्र नभई लोकतान्त्रिक पद्धतिलाई कमजोर पार्ने खतरा रहेको छ।
सिंहले भने, “संविधानविपरीत निर्णय र क्रियाकलापले प्रदेशको राजनीतिक वातावरणलाई दूषित बनाएको छ। लोकतन्त्र र संविधानको रक्षा गर्न सबै सचेत नागरिक एकजुट हुन आवश्यक छ।”
उनले सम्पूर्ण लोकतान्त्रिक दल, नागरिक समाज र लोकतन्त्रप्रेमी जनसमुदायलाई गैरसंवैधानिक गतिविधिविरुद्ध आवाज उठाउन आह्वान समेत गरेका छन्। सिंहले मधेश प्रदेशमा संवैधानिक मर्यादा र लोकतान्त्रिक मूल्य मान्यताको संरक्षण सबैको साझा दायित्व भएको र अस्थिरता फैलाउने योजनाविरुद्ध व्यापक प्रतिरोध आवश्यक रहेको बताए।
