काठमाडौं, २९ कात्तिक । नेपाल–भारतको खुला सिमाना केवल मानिसहरूको आवाजाहीका लागि मात्र सीमित छैन, यो क्षेत्र वन्यजन्तुको ऐतिहासिक आवागमन मार्ग समेत बनेको छ। विशेषगरी तराईका जङ्गलहरू आपसमा जोडिएको भएकाले जङ्गली हातीसहितका जनावरहरू दुवै देशबीच नियमित रूपमा आवतजावत गर्ने गर्छन्।
पश्चिम नेपालको बर्दिया राष्ट्रिय निकुञ्ज र भारतको उत्तर प्रदेशस्थित कतर्नियाघाट वाइल्डलाइफ सेन्चुरी बीच हात्तीहरूको परम्परागत बसाइँ–सराइ मार्ग रहेको छ। हरेक वर्ष सयौँ हात्तीहरू खाद्यान्न खोजी र वर्षाको पानीबाट जोगिन यो मार्ग प्रयोग गरी सीमा पार गर्ने अनुसन्धानहरूले देखाएका छन्।
तर, पछिल्ला वर्षहरूमा सीमा क्षेत्रका बस्ती विस्तार, कृषि क्षेत्र अतिक्रमण, तारबार र अन्य मानव–निर्मित संरचनाले हात्ती आवतजावत अवरुद्ध हुन थालेपछि मानव–हात्ती द्वन्द्व तीव्र बन्दै गएको छ।
यसले जनधनको क्षति हुने, खेतबाली नष्ट हुने र सुरक्षामा चुनौती पैदा गर्ने अवस्था बढाएको स्थानीयवासी बताउँछन्।
