बीरगन्ज,२९ कात्तिक । मधेश प्रदेश प्रमुख डा. सुरेन्द्र लाभले आज दिउँसो ३ बजे बोलाएको सर्वदलीय बैठक सात दलीय गठबन्धनले बहिष्कार गरेको छ। बैठकमा वर्तमान मुख्यमन्त्री सरोज कुमार यादव नेकपा एमालेका संसदीय दलका नेताको रूपमा सहभागी भएपछि गठबन्धनका दलहरूले विरोध स्वरूप बैठकमा उपस्थित नहुने निर्णय गरेका हुन्।
मुख्यमन्त्री यादव भने बैठकमा उपस्थित भएका छन्।
जसपा नेपालका प्रमुख सचेतक राम अशिष यादवका अनुसार, मुख्यमन्त्री यादवलाई असंवैधानिक रूपमा नियुक्त गरी होटलमा शपथ ग्रहण गराइएको छ। “सुनुवाइ बाँकी रहेको अवस्थामा विवादित मुख्यमन्त्री सहभागी हुने बैठकमा हामी सामेल हुन सक्दैनौं,” उनले भने।
सात दलीय गठबन्धनमा जसपा नेपाल, लोसपा, जनमत पार्टी, नेकपा एकीकृत समाजवादी, नेकपा माओवादी केन्द्र लगायतका दलहरू रहेका छन्। गठबन्धनको बहिष्कारसँगै मधेश प्रदेशको राजनीतिक द्वन्द्व झनै तीव्र बन्दै गएको छ, जहाँ मुख्यमन्त्रीको संवैधानिक वैधतामाथि प्रश्न उठ्दै आएको छ।
