रौतहट,२९ कात्तिक । रौतहटको गौर नगरपालिका–५, हनुमान चोक नजिकै रहेको वीरेन्द्र चौरसियाद्वारा सञ्चालित सिरक–डसना पसलमा शनिबार दिउँसो भीषण आगलागी भएको छ।
अढाई बजेतिर सुरु भएको आगलागीले पसलभित्र रहेका सम्पूर्ण सामग्री जलेर नष्ट भएको प्रारम्भिक जानकारी प्रहरीले दिएको छ। प्रारम्भिक अनुसन्धानअनुसार करेन्ट सर्टका कारण जस्ताको छानो भएको कच्ची घरमा पसलमा आगो लागेको बताइएको छ।
जिल्ला प्रहरी प्रवक्ता डीएसपी विष्णु प्रदीप बस्यालका अनुसार आगलागीबाट करिब १० लाख रुपैयाँ बराबरको क्षति भएको अनुमान गरिएको छ। आगो नियन्त्रणमा लिन प्रहरी, सशस्त्र प्रहरी, नेपाली सेना र स्थानीयवासीको सहयोगमा दमकल प्रयोग गरिएको थियो र दिउँसो साढे ३ बजेतिर आगो पूर्ण रूपमा नियन्त्रणमा आएको थियो।
पसलमा रहेका सामग्रीहरू जस्तै मोटर, डस्ना बनाउने मेसिन, कपास, डस्ना कपडा, रुई, तकिया, सिरक, बेन्च, टेबल, टीभी, पंखा र टेन्ट कपडा सबै जलेर नष्ट भएका छन्।
स्थानीयहरूले समयमै सूचना दिएर सहयोग गरेकाले आगो अन्य घरमा फैलिनबाट रोकिएको प्रहरीको जानकारी छ। जिल्ला प्रहरी कार्यालयले विद्युत् सर्टका कारण आगो लागेको प्रारम्भिक निष्कर्ष दिएको भए पनि, थप अनुसन्धान भइरहेको बताइएको छ।
