बारा,३० कातिक । मधेश प्रदेशको बारा जिल्लामा प्रहरीले लागुऔषधसहित दुई महिलालाई पक्राउ गरेको छ। जितपुर सिमरा उपमहानगरपालिका–५ लल्का पुल नजिक विशेष सूचनाका आधारमा गरिएको चेकजाँचपछि उनीहरू पक्राउ परेका हुन्।
इलाका प्रहरी कार्यालय सिमराका प्र.ना.नि. दीपक कुमार बस्नेतको कमान्ड र लागुऔषध नियन्त्रण ब्युरो पर्साका प्र.स.नि. गोपाल खड्काको नेतृत्वमा खटिएको संयुक्त प्रहरी टोलीले आज दिउँसो करिब १५:४० बजे वीरगंजबाट पथलैया तर्फ पैदल आइरहेका दुई महिलालाई शंका लागेर रोकतोक गरी चेकजाँच गरेको थियो। तलासीका क्रममा प्रहरीले ब्राउन सुगर जस्तो देखिने खैरो धुलो पदार्थ बरामद गरेको जनाएको छ।
पर्सा, पटेर्वा सुगौली गाउँपालिका–५ निचुटा टोलकी ३५ वर्षीया सुसिला देवीको साथबाट ७ पुरियामा ४४.४०० ग्राम (४४ ग्राम ४०० मिलिग्राम) ब्राउन सुगरजस्तो पदार्थ फेला परेको प्रहरीले जानकारी दिएको छ। उनीसँगै रहेकी ३० वर्षीया पूजा देवी, ऐ.ऐ. पोखरिया नगरपालिका–७ की बसोबास भएकी, समेत प्रहरी नियन्त्रणमा परेकी छन्।
दुवै जनालाई अहिले इलाका प्रहरी कार्यालय सिमरामा राखेर थप अनुसन्धान अघि बढाइएको बारा प्रहरीले जनाएको छ। लागुऔषध फेला परेको स्थान इलाका प्रहरी कार्यालय सिमरा देखि करिब ३ किलोमिटर दक्षिण तर्फ पर्ने बताइएको छ।
