काठमाडाैं,३० कातिक । नेपाल प्रहरीले सिराहामा अवैध लागुऔषधसहित दुई जनालाई पक्राउ गरेको छ। हिजो साँझ ६ः४० बजे इलाका प्रहरी कार्यालय झाझपट्टीको टोलीले गोप्य सूचनाका आधारमा नवराजपुर गाउँपालिका–४ स्थित बाटोमा भारततर्फबाट नेपाल प्रवेश गर्दै गरेको स १० प ७८६ नम्बरको मोटरसाइकल रोकी चेकजाँच गरेको थियो।
जाँचका क्रममा ब्राउन सुगर जस्तो देखिने पदार्थ फेला परेपछि २ जनालाई पक्राउ गरिएको हो। पक्राउ पर्नेमा सप्तरी सुरुङ्गा नगरपालिका–७ चक्रदह बस्ने २१ वर्षीय विक्रान्त चौधरी र मोटरसाइकलमा पछाडि सवार सिराहाको लहान नगरपालिका–१ मटिहरवा बस्ने २६ वर्षीय शीतल चौधरी रहेका छन्।
उनीहरूको साथबाट प्लास्टिकमा प्याक गरिएको ब्राउन सुगर जस्तो देखिने पदार्थ तौल गर्दा १.६ ग्राम बरामद भएको प्रहरी स्रोतले जनाएको छ। प्रहरीले दुवै जनालाई नियन्त्रणमा लिएर अनुसन्धान प्रक्रिया सुरु गरेको छ।
