काठमाडौँ,३० कातिक । जिल्ला अदालत काठमाडौँले महाराजगञ्जमा प्रहरी जवान उत्तम थापा हत्या प्रकरणका ४ जना आरोपीहरूलाई पुर्पक्षका लागि थुनामा पठाउने आदेश दिएको छ।
आदेशअनुसार २२ वर्षीय सोम गुरुङ (गोर्खा), २१ वर्षीय राजीव गुरुङ (तनहुँ), २० वर्षीय युनिक श्रेष्ठ (पर्सा) र १९ वर्षीय विनोद कार्की (सिन्धुली)लाई पुर्पक्षका लागि कारागार पठाइने भएको छ।
गत भदौ २३–२४ गते भएको जेनजी प्रदर्शनका क्रममा प्रदर्शनकारीको आक्रमणबाट असई मिलन राय र जवान उत्तम थापाले ज्यान गुमाएका थिए। प्रहरी अनुसन्धान अनुसार, यसअघि पनि यस घटनामा संलग्न अन्य ४ जना (युवराज क्याप्छाकी, सोनाम तामाङ/बुद्धिलाल थिङ, होम प्रसाद पौडेल, टिकाराम बिक) पुर्पक्षका लागि कारागार चलान भइसकेका छन्।
प्रहरी अनुसन्धानले मृतक जवान थापाको हत्यामा क्याप्छाकी र थिङ संलग्न रहेको पत्ता लगाएको थियो भने असई रायको हत्या पौडेल र विकले गरेको पुष्टि भएको थियो।
जिल्ला सरकारी वकिल कार्यालयले अनुसन्धान प्रतिवेदनको आधारमा मुद्दा दर्ता गरेको थियो।
