बीरगन्ज,०२ मंसिर । मधेस प्रदेशका मुख्यमन्त्री सरोजकुमार यादवलाई पदबाट हटाउन माग गर्दै सात राजनीतिक दलले जनकपुरधाममा सुरु गरेको धर्ना दोस्रो सातामा प्रवेश गरेको छ। मंगलबारसम्म धर्ना लगातार नौ दिन पुगेको छ।
नेपाली कांग्रेस, जसपा नेपाल, जनमत पार्टी, नेकपा (माओवादी केन्द्र), लोसपा नेपाल, नेकपा (एस) र नागरिक उन्मुक्ति पार्टी समावेश सातदलीय गठबन्धनले मधेस भवन अगाडिको सडक क्षेत्रमा निरन्तर विरोध प्रदर्शन गर्दै आएको छ।
गठबन्धनका दलहरूले मुख्यमन्त्री यादवले प्रदेशको राजनीतिक मर्यादा, सहकार्य भावना र संविधानसम्मत कार्यप्रणालीविपरीत कदम चालेको आरोप लगाउँदै तत्काल बर्खास्तीको माग अघि सारेका छन्। माग पूरा नभएसम्म चरणबद्ध आन्दोलन जारी रहने उनीहरूको चेतावनी छ।
धर्नाका कारण मधेस भवन परिसरकै सुरक्षामा कडाइ गरिएको छ। सुरक्षा सुदृढीकरणसँगै सो क्षेत्रका सडकहरूमा यातायात आवागमन समेत प्रभावित बनेको छ।
