काठमाडौं,०२ मंसिर । नेपाली कांग्रेसका महामन्त्री गगनकुमार थापा र विश्वप्रकाश शर्माले पार्टी नेता डा. शेखर कोइरालासँग भेटवार्ता गर्ने तयारी गरेका छन्। बैठक विशेष महाधिवेशनको विषयमा हुने जानकारी छ।
नेता कोइरालाले नियमित महाधिवेशन समयमै नभए विशेष महाधिवेशनमार्फत पार्टी एकता कायम राख्नुपर्ने धारणा सार्वजनिक गरेपछि महामन्त्रीहरूले उनीसँग भेट गर्ने निर्णय गरेका हुन्।
कोइरालाले मंगलबार आफ्ना नजिकका केही युवा नेताहरूसँगको छलफलमा भनेका थिए, “मंसिरको सट्टा पुस अन्तसम्म महाधिवेशन हुनुपर्यो। हुन सकेन भने केन्द्रीय कार्यसमितिले निर्णय गरेर विशेष महाधिवेशनमा जाने। सेन्ट्रल कमिटीले बहुमतको आधारमा होइन, सम्पूर्ण बडीले निर्णय गर्नेछ।”
नियमित महाधिवेशनका लागि संस्थापन पक्षसँग सहमति नबनेपछि विशेष महाधिवेशन अपरिहार्य रहेको महामन्त्रीहरूले औँल्याएका छन्। गगनकुमार थापाले २७ मंसिरमा केन्द्रीय कार्यसमितिमा विशेष महाधिवेशनको प्रस्ताव पेश गरिसकेका छन्।
मंगलबार हुने भेटवार्ताको समय र स्थान भने अहिलेसम्म सार्वजनिक गरिएको छैन।
