जनकपुर,०३ मंसिर । मधेस प्रदेशसभामा सभामुख रामचन्द्र मण्डलविरुद्ध दर्ता भएको ‘पदअनुकूल आचरण नगरेको’ प्रस्ताव आज छलफल हुने तय भए पनि प्रदेशसभा भवनमा विद्युत् लाइन काटिँदा बैठक अनिश्चित बनेको छ।
आज दिउँसो १ बजेका लागि बोलाइएको बैठकमा सांसदहरू समयमै उपस्थित भए पनि लाइन नआएपछि बैठक सञ्चालनमा अन्योलता बढेको प्रदेशसभा स्रोतले जानकारी दिए। वैकल्पिक उपायस्वरूप सभा कक्ष सञ्चालनका लागि डिजे जेनेरेटर ल्याइएको छ भने इन्टरनेट पहुँच सुनिश्चित गर्न वाइफाइ जडान गर्ने काम पनि भइरहेको छ।
सात दलीय गठबन्धन र नेपाली कांग्रेससहित ६४ सांसदले सभामुखमाथि प्रस्ताव दर्ता गरेका कारण आजको बैठक राजनीतिक दृष्टिले अत्यन्त महत्वपूर्ण मानिएको छ। मंगलबार ३२ सांसदले उपसभामुख बबिता राउत ईशरलाई ज्ञापनपत्र बुझाएर बैठक बोलाउन आग्रह गरेका थिए।
हाल प्रदेशसभाभित्र प्राविधिक तयारी जारी छ, बैठक कहिले सुरु हुने भन्ने स्पष्टता आउन बाँकी रहेको स्रोतले बताए।
