काठमाडौँ,०३ मंसिर । एमसीसी नेपाल कम्प्याक्ट अन्तर्गत नेपालले ७ अर्ब ८ करोड रुपैयाँ (९५ करोड अमेरिकी डलर) बराबरको अतिरिक्त अनुदान पाएको छ।
नेपालस्थित अमेरिकी दूतावासका अनुसार, नेपाल सरकार र अमेरिकी सरकारबीच भएको सम्झौताअन्तर्गत यो रकम थप गर्ने निर्णय भएको हो। यससँगै एमसीसी अन्तर्गत नेपाललाई उपलब्ध कुल रकम ७४ करोड ७० लाख अमेरिकी डलर (करिब १ खर्ब ६ अर्ब रुपैयाँ) पुगेको छ। यसमा अमेरिकाको ५५ करोड डलर र नेपाल सरकारको १९ करोड ७० लाख डलर योगदान रहनेछ।
अमेरिकी दूतावासका अनुसार, यो अतिरिक्त अनुदान नेपालको ऊर्जा प्रणाली सुदृढ गर्ने, प्राथमिक विद्युत् प्रसारण पूर्वाधार निर्माण पूरा गर्ने र क्षेत्रीय ऊर्जा व्यापार विस्तार गर्ने उद्देश्यका लागि प्रयोग हुने छ। यसले ऊर्जा ग्रिडको विश्वसनीयता र बजार पहुँच सुधार्ने साथै अन्तर्राष्ट्रिय कनेक्टिभिटीमा पनि सहयोग पुर्याउने अपेक्षा गरिएको छ।
साथै, यो परियोजनाले अमेरिकी प्रविधि र कम्पनीहरूलाई नेपाली बजारमा प्रवेश गर्ने अवसर पनि वृद्धि गर्ने दूतावासले जनाएको छ।
