काठमाडौँ,०७ मंसिर । फागुन २१ गते हुने प्रतिनिधिसभा निर्वाचनको सुरक्षा व्यवस्थालाई मजबुत बनाउन सशस्त्र प्रहरी बलले ५९ वटा नयाँ सवारीसाधन खरिद गर्न लागेका छन्।
जेनजी आन्दोलनपछि भएको आगजनीका कारण सवारीसाधन अभाव देखिएपछि सशस्त्र प्रहरीले चुनावका लागि नयाँ गाडी आवश्यक भएको प्रस्ताव गरेको थियो। सो प्रस्तावलाई अर्थ मन्त्रालयले स्वीकृति दिँदै २१ करोड ६ लाख रुपैयाँ स्रोत सुनिश्चित गरेको हो।
सशस्त्रले खरिद गर्न लागेका सवारीसाधनमध्ये ५० वटा बोलेरो पिकअप, ३ वटा दंगा नियन्त्रण ट्रक, २ वटा एम्बुलेन्स र ३ वटा विपद् उद्धारका लागि प्रयोग हुने विशेष सवारीसाधन रहेका छन्।
यसैबीच, नेपाल प्रहरीले पनि निर्वाचन सुरक्षाका लागि १८५ वटा गाडी खरिद गर्ने प्रक्रिया अघि बढाएको छ। प्रहरी प्रधान कार्यालयले पहिले चरणमा ८५ सवारीसाधनका लागि बोलपत्र आह्वान गरिसकेको छ भने थप १०० गाडी खरिदका लागि टेन्डर प्रक्रियामा प्रवेश गरिसकेको छ।
