काठमाडौँ,०९ मंसिर । नेपाली कम्युनिष्ट पार्टीका सह–संयोजक माधवकुमार नेपालले नयाँ एकीकृत पार्टी बनेको परिस्थितिमा अब पुराना पार्टीगत मानसिकता र ‘धङधङी’बाट कार्यकर्ताहरू मुक्त हुनुपर्ने बताएका छन्।
अखिल नेपाल ट्रेड युनियनले मंगलबार आयोजना गरेको कार्यक्रममा सम्बोधन गर्दै नेपालले १४ वटा घटक मिलेर नयाँ पार्टी गठन भइसकेकाले पेरिसडाँडा, आलोकनगरजस्ता पूर्वाधार–आधारित सोच छाडेर एकीकृत संगठन निर्माणमा लाग्न सबैलाई निर्देशन दिए।
नेपालले विगतका संरचना र समूहगत पहिचानले नयाँ पार्टीभित्र विभाजन निम्त्याउने चेतावनी दिंदै भने,“पेरिसडाँडा मेरो, आलोकनगर तपाईँहरूको भन्ने मानसिकता अब छाड्नुपर्छ। संगठन मेरो–तिम्रो भनेर छुट्ट्याउने भ्रमबाट मुक्त हुनुपर्छ।”
उनका अनुसार नयाँ पार्टीको एकतालाई मजबुत बनाउने प्रक्रियामा जनसंगठनहरूलाई पनि एउटै संरचनामा ल्याउनुपर्नेछ।
इतिहासको व्यापक अध्ययन आवश्यक नेपालले इतिहासको चर्चा गर्दा केवल २०५२ सालबाट होइन, २००६ सालदेखि सुरू भएको आन्दोलन र २०२८ सालको झापा विद्रोहसम्मका योगदानहरू स्मरण गर्नुपर्ने बताए।
उनले एक व्यक्तिमात्रै केन्द्रमा राखेर चर्चा गर्ने प्रवृत्तिले पार्टीभित्र ‘बा प्रवृत्ति’ बढ्ने भन्दै त्यसबाट सचेत रहन आग्रह गरे।
विश्वास र एकताले मात्रै पार्टी बलियो— नेपाल “एकअर्कामाथिको विश्वासले मात्र हाम्रो पार्टी नेपाली जनताको आशा र भरोसाको केन्द्र बन्न सक्छ,” नेपालले भने।
उनका अनुसार एकीकृत पार्टीले पुराना बिस्तारै कमजोर बनाउँदै सहकार्य, प्रशिक्षण र सांस्कृतिक रूपान्तरणमार्फत सुदृढ संगठन निर्माणतर्फ अघि बढ्नुपर्छ।
