काठमाडौँ,१० मंसिर । मधेस केन्द्रित सात दलले गठन गरेको संघीय लोकतान्त्रिक मोर्चा अहिले चुनावका लागि सिट बाँडफाँटमा केन्द्रित भएको छ। संविधान संशोधन र लोकतान्त्रिक उपलब्धि संरक्षणका लागि गठित यो मोर्चा अब एउटै चुनाव चिह्नमा तालमेल गरेर सांसद बन्ने रणनीतिमा लागेको छ।
तर मोर्चाभित्रका केही दलले छुट्टाछुट्टै आन्दोलन सुरु गरेका छन्। जसपा नेपालले २८ बुँदे मागसहित, जनमत पार्टीले १२ बुँदे मागसहित प्रधानमन्त्रीलाई ज्ञापनपत्र बुझाइसकेको छ भने राष्ट्रिय मुक्ति पार्टी पनि आन्दोलन तयारीमा छ।
जसपा नेपालका महासचिव रामकुमार शर्माका अनुसार मोर्चाभित्र सबै दल अन्ततः आन्दोलनमा सहभागी हुनेछन्। तर राष्ट्रिय मुक्ति पार्टीका महासचिव सन्तोष मेहता भने मोर्चाभित्र सहमति बिना छुट्टाछुट्टै आन्दोलनले नकारात्मक सन्देश दिएको बताए।
