बीरगन्ज,१० मंसिर । आगामी फागुन २१ मा हुने प्रतिनिधिसभा निर्वाचनका लागि पर्सामा १५ हजार ४५ जना नयाँ मतदाता थपिएका छन्। जिल्ला निर्वाचन कार्यालय पर्साका प्रमुख अनामिका रौनियारका अनुसार असोज १० देखि मंसिर ५ सम्म मतदाता अद्यावधिक प्रक्रियामा यो संख्या दर्ता भएको हो।
नयाँ थपिएका मतदातामध्ये पुरुष ८ हजार २४२ र महिला ६ हजार ८०३ जना रहेका छन्। रौनियारले जानकारी दिँदै भनिन् नयाँ मतदातामध्ये १४ हजार ३१८ जना जिल्ला भित्र आएर दर्ता गराएका छन् भने ७ सय २७ जना जिल्ला बाहिरबाट दर्ता भएका छन्।
यस अद्यावधिकसँगै पर्साको कूल मतदाता संख्या ३ लाख ५२ हजार ४८४ पुगेको छ। तीमध्ये पुरुष मतदाताको संख्या १ लाख ९८ हजार ८०८, महिला मतदाता १ लाख ५३ हजार ६६१ र फरक लिङ्गका मतदाता १५ रहेका छन्।
जिल्ला निर्वाचन कार्यालयले मतदाता दर्ता प्रक्रियालाई सरल र पारदर्शी बनाउन विभिन्न सुविधा तथा सचेतना कार्यक्रम सञ्चालन गरेको जनाएको छ।
