बारा,१२ मंसिर । भारतबाट नेपालतर्फ कोकिन तस्करी गर्दै गरेको अवस्थामा एक भारतीय नागरिक बिहीबार पक्राउ परेका छन्। जिल्लाको बिश्रामपुर गाउँपालिका–१, खेखरिया क्षेत्रमा चेकजाँचका क्रममा उनलाई पक्राउ गरिएको जिल्ला प्रहरी कार्यालय बाराका प्रवक्ता डिएसपी विजयराज पण्डितले जानकारी दिए।
उनका अनुसार पक्राउ परेका व्यक्ति पूर्वी चम्पारण, विहार नायकटोलका ३५ वर्षीय लालबाबु साह हुन्। साहले चलाइरहेको भारतीय नम्बर प्लेटको मोटरसाइकल (बीआर ०५ एभी ३५३२) मा प्रहरीले २१ ग्राम ६५० मिलिग्राम लागुऔषध कोकिन फेला पारेको हो।
कोकिन कसरी र कहाँबाट ल्याइएको हो भन्नेबारे अनुसन्धान जारी रहेको प्रहरीको भनाइ छ। पक्राउ परेका साहलाई नियन्त्रणमा लिएर आवश्यक कारबाही अघि बढाइएको छ।
