बीरगन्ज,१४ मंसिर । पर्सा प्रहरीले एक महिनाको कार्यसम्पादन सार्वजनिक गर्दै जिल्लामा अपराध नियन्त्रण, अवैध गतिविधि रोकथाम र सीमाक्षेत्र निगरानीमा उल्लेखनीय प्रगति भएको जनाएको छ।
कार्तिक ७ देखि मंसिर ७ सम्मको अवधिमा फरार रहेका १८४ जना प्रतिवादी पक्राउ परेका छन्। पक्राउ परेकाबाट ६ लाख २ हजार रुपैयाँ जरिवाना असुल भएको छ भने १८ वर्ष १ महिनाको कैद सजाय कार्यान्वयन गरिएको छ।
सीमाक्षेत्रमा निगरानी कडाइ गर्दै प्रहरीले खाद्यान्न, कपडा लगायतका ३ करोड ७५ लाख रूपैयाँ बराबरका भन्सार छली सामग्री बरामद गरेको छ। त्यस्तै, २७ किलो ४८० ग्राम गाँजा बरामद गरी चार जनालाई पक्राउ गरिएको छ।
अवैध गतिविधि नियन्त्रणमा, ५ सय लिटर घरेलु मदिरा नष्ट गरिएको छ भने बालुवा उत्खननमा संलग्न पाँच ट्र्याक्टर नियन्त्रणमा लिइएको छ। वन अपराध नियन्त्रण अन्तर्गत ६१.५ क्युबिक फिट सालको अवैध काठ बरामद भएको छ।
हराइरहेका नौ जनामध्ये सात बालिका र दुई महिलालाई फेला पारेर अभिभावकको जिम्मामा बुझाइएको छ, साथै थप दुई बालिकालाई उद्धार गरिएको छ।
पर्सा प्रहरीले आगामी दिनमा अपराध नियन्त्रण, सीमाक्षेत्र निगरानी र जनसुरक्षाका कार्यक्रमलाई अझ प्रभावकारी रूपमा अघि बढाउने प्रतिबद्धता व्यक्त गरेको छ।
