बीरगन्ज,१४ मंसिर । बाराको जीतपुरसिमरा उपमहानगरपालिका–३, बजनीमा आइतबार बिहान भएको सडक दुर्घटनामा एक युवतीको मृत्यु भएको छ। मोटरसाइकललाई ट्र्याक्टरले ठक्कर दिएपछि घाइते भएकी जीतपुरसिमरा–७ की २० वर्षीया ज्योतिकुमारी गुप्ताको उपचारका क्रममा मृत्यु भएको प्रहरीले जनाएको छ।
सिमराबाट जीतपुरतर्फ जाँदै गरेको ना३त १०९८ नम्बरको ट्र्याक्टरले सोही दिशाबाट आउँदै गरेको मधेस प्रदेश ०३–०३२ प ९५९० नम्बरको मोटरसाइकललाई बजनीमा ठक्कर दिएको थियो। ठक्करपछि मोटरसाइकल अनियन्त्रित भई एक साइकलमा समेत ठोक्किएको प्रहरीले बताएको छ।
दुर्घटनामा मोटरसाइकलकी चालक ज्योतिकुमारी गम्भीर घाइते भई वीरगञ्जस्थित नेपाल मेडिसिटी बयोधा अस्पतालमा उपचाररत रहेकी थिइन्। तर उपचारका क्रममा उनको मृत्यु भयो।
यस दुर्घटनामा मोटरसाइकलको पछाडिको सीटमा सवार आस्था गुप्ता र साइकल चालक जीतपुरसिमरा–२ का ४२ वर्षीय कृष्ण मगर घाइते भएको प्रहरीले जनाएको छ।
