जनकपुर,१५ मंसिर । सप्तरीको खडक नगरपालिका–११ बनौलीस्थित हुलाकी सडकखण्डमा मोटरसाइकलको ठक्करबाट एक जनाको मृत्यु भएको छ। मृत्यु हुनेमा ४२ वर्षीय दिप्रेन्द्र पासवान रहेको जिल्ला प्रहरी कार्यालय सप्तरीले जानकारी दिएको छ।
आइतबार राति सडकछेउमा पार्क गरिएका नम्बर नखुलेको ट्याक्टरमा पछाडि थ्रेसर जोडेर धान मिडाइ भइरहेको समयमा पासवान सडकमा उभिइरहेको अवस्थामा बोदेबर्साईनबाट राजविराजतर्फ जाँदै गरेको प्रदेश २–०१–००१ प १७०८ नम्बरको मोटरसाइकलले उनलाई ठक्कर दिएको थियो।
गम्भीर घाइते भएका पासवानलाई उपचारका लागि छिन्नमस्ता अस्पताल, राजविराज पुर्याइए पनि चिकित्सकले मृत घोषित गरेका थिए, प्रहरी नायब उपरीक्षक डम्बरबहादुर पुरीले बताए।
उक्त दुर्घटनामा मोटरसाइकल चालक शम्भुनाथ नगरपालिका–१२ अर्नाहाचौकका २८ वर्षीय रामचन्द्र चौधरी घाइते भएका छन् र उनी उपचाररत रहेको प्रहरीले जनाएको छ। घटनाबारे थप अनुसन्धान जारी छ।
