जनकपुर,०७ पुस । ज्यानसम्बन्धी कसुरमा अदालतबाट दोषी ठहर भई लामो समयदेखि फरार रहेका एक जना प्रतिवादीलाई धनुषा प्रहरीले १७ वर्षपछि पक्राउ गरेको छ। जिल्ला प्रहरी कार्यालय धनुषाका अनुसार विशेष सूचनाको आधारमा खोजतलास तीव्र पार्दै जिल्लाका विभिन्न स्थानमा निगरानी गरिएको थियो। सोही क्रममा फरार प्रतिवादीलाई नियन्त्रणमा लिन प्रहरी सफल भएको हो।
प्रारम्भिक अनुसन्धानबाट ती प्रतिवादी लामो समयदेखि विभिन्न स्थानमा लुकीछिपी बस्दै आएको खुलेको प्रहरीले जनाएको छ। पक्राउ परेका व्यक्तिको नाम र ठेगाना हाल सार्वजनिक गरिएको छैन । प्रहरीका अनुसार आवश्यक कानुनी प्रक्रिया पूरा गरी प्रतिवादीलाई फैसला कार्यान्वयनका लागि सम्बन्धित अदालतमा पेश गरिने तयारी भइरहेको छ।
धनुषा प्रहरीले गम्भीर प्रकृतिका अपराधमा संलग्न भई फरार रहेका अभियुक्तहरूको खोजीलाई अझ तीव्र बनाएको बताउँदै कानुनको दायराबाट कसैलाई पनि उम्कन नदिइने जनाएको छ।
