वीरगन्ज,०७ पुस । पर्सा क्षेत्र नम्बर ३ का पूर्व प्रदेशसभा सदस्य प्रहलाद गिरि र पूर्व बिन्दवासिनी गाउँपालिका अध्यक्ष श्रीलाल साह (मोदी)सहित नेकपा एमाले र अन्य दलका १ सयभन्दा बढी नेताकार्यकर्ता सोमबार नेपाली कम्युनिष्ट पार्टीमा प्रवेश गरेका छन्।
काठमाडौँको पेरिसडाँडा स्थित पार्टी केन्द्रीय कार्यालयमा आयोजित कार्यक्रममा संयोजक पुष्पकमल दाहाल (प्रचण्ड), सहसंयोजक माधवकुमार नेपाल र नेताहरूले नवप्रवेशी नेताहरूलाई अबीर टीका लगाएर स्वागत गरेका थिए।
पार्टी प्रवेश गर्ने अन्य नेताहरूमा हनिफ मियाँ अन्सारी, सन्जय चौहान, मुकेश चौरसिया, गजारी साह तेली, विनादेवी बैठा र रमेश कुमार साहलगायत रहेका छन्। यससँगै पर्सा–३ मा नेपाली कम्युनिष्ट पार्टीको संगठन विस्तार र प्रभाव बढाउने प्रयासलाई थप बल मिल्ने देखिएको छ।
