काठमाडौँ,१४ पुस । काठमाडौँको चुच्चेपाटीबाट प्रहरीले नक्कली सुन देखाएर ठगी गरेको आरोपमा ४ जनालाई पक्राउ गरेको छ।
पक्राउ पर्नेमा मकवानपुर इन्द्रसरोबर गाउँपालिका घर भएका ४५ वर्षीय सुकुमान सिंह ब्लोन, ४८ वर्षीय राजेन्द्र तामाङ, मकवानपुर बकैया गाउँपालिका घर भएका ५३ वर्षीय स्याङ्तान उर्फ बिर बहादुर, र नवलपरासी देवचुली नगरपालिका घरका ४२ वर्षीय जित बहादुर तामाङ रहेका छन्।
जिल्ला प्रहरी परिसर काठमाडौँका एसपी पवन भट्टराईका अनुसार, आरोपीहरूले पुस ८ गते दुई युवालाई कागेश्वरी मनोहरा नगरपालिका–५ स्थित थलीमा बोलाएर पहेँलो धातुको डल्लो देखाउँदै ५ लाख रुपैयाँ ठगी गरेका थिए। प्रारम्भिक अनुसन्धानले उनीहरूले सुन भएको भ्रम दिलाउन मोजामा प्याक गरिएको पहेँलो धातु प्रयोग गरेको देखाएको छ।
पक्राउ पर्ने समूहलाई प्रहरी वृत्त बौद्धको टोलीले चुच्चेपाटीबाट नियन्त्रणमा लिएको हो। उनीहरूमाथि ठगी सम्बन्धी कसुरमा अदालतबाट म्याद लिएर अनुसन्धान भइरहेको एसपी भट्टराईले बताए।
