सप्तरी,१४ पुस । सप्तरीको हनुमाननगर कंकालिनी नगरपालिकामा आगो ताप्ने क्रममा एक महिला जलेर घाइते भएकी छन्।
नगरपालिकाको वडा नम्बर–१ स्थित कोशी ब्यारेज क्षेत्रमा आफ्नै भान्साघरको चुलोमा आगो ताप्ने क्रममा २२ वर्षीया कविता रामको साडीमा अचानक आगो सल्किँदा घटना भएको हो। आगो सल्किँदा उनको कम्मरभन्दा मुनिको करिब २० प्रतिशत भाग जलेर घाइते भएको इलाका प्रहरी कार्यालय कल्याणपुरका प्रहरी नायब उपरीक्षक माधवप्रसाद काफ्लेले जानकारी दिनुभएको छ।
घटनापछि घाइते कवितालाई उपचारका लागि तत्काल भारदह अस्पताल, सप्तरी लगिएको थियो। अस्पतालका अनुसार हाल उनको उपचार भइरहेको छ भने स्वास्थ्य अवस्था क्रमशः सुधार हुँदै गएको छ।
प्रहरीले चिसो मौसममा आगो ताप्दा विशेष सतर्कता अपनाउन सर्वसाधारणलाई अनुरोध गरेको छ।
