काठमाडौं । शुक्रबार राति भद्रपुर विमानस्थलमा भएको बुध्द एयरको दुर्घटना बिषयमा अध्ययन गर्न प्राविधिक टोली भद्रपुर पुगेका छन् ।
नेपाल नागरिक उड्डयन प्राधिकरणका महानिर्देशक डिसिएल कर्णको नेतृत्वमा प्राधिकरण, पर्यटन तथा नागरिक उड्डयन मन्त्रालयका प्रतिनिधि र बुध्द एयरको प्राविधिक टोली आवश्यक उपकरणसहित भद्रपुर पुगेका छन् ।
टोली केहि समयअघि भद्रपुर विमानस्थलमा पुगेका छन् ।
बुध्द एयरले भद्रपुरमा भएको जहाज दुर्घटनामा परि घाइते भएका यात्रुहरु सामान्य उपचारपश्चात घर फर्किसकेको जानकारी दिएको छ ।
बुध्द एयरले आज बिहान आफ्नो आधिकारिक पेजमा सूचना जारी गर्दै दुर्घटनामा परेका यात्रुहरु सामान्य उपचारपश्चात आफ्नो घर फर्केको जानकारी दिएको हो ।
काठमाडौंबाट भद्रपुरका लागि उडेको कलसाइन ९०१ रहेको बुध्द एयरको एटीआर ७२ जहाज भद्रपुर विमानस्थलमा अवतरण गर्ने क्रममा रन-वेको पूर्वतर्फ ३०० मिटर ओभर रन भई जहाज घाँसे झाडी र माटोमा भासिएर शुक्रबार राति दुर्घटना भएको थियो ।
जहाजमा ५१ जना यात्री, चार जना चालक दलका सदस्य र एक जना विमानका इन्जिनियर थिए । कोपाइलटसहित ७ यात्रु सामान्य घाइते घाइते भएका थिए ।
बुध्द एयरले परिस्थिति काबु बाहिर गएको घटनाप्रति कम्पनी निकै गम्भीर भएको बताएको छ । दुर्घटनापश्चात तत्कालै उद्धार कार्यमा तदारुकताका खटिएका नेपाली प्रहरी, नेपाली सेना, नागरिक उड्डयन प्राधिकरण र बुध्द एयरका कर्मचारीप्रति आभारसमेत व्यक्त गरेको छ ।
बुध्द एयरले घटनाको विस्तृत छानबिनका लागि नागरिक उड्डयन प्राधिकरणलाई पूर्ण रूपमा सहयोग गर्ने प्रतिबद्धतासमेत जनाएको छ ।
