काठमाडाैं । अमेरिकी राष्ट्रपति डोनाल्ड ट्रम्पले शनिबार सामाजिक सञ्जालमा आफ्नो स्वास्थ्य र अन्य विषयमा पोस्ट गरिरहेका थिए। त्यही समयमा भेनेजुएलामा एउटा ठूलो सैन्य कारबाही सम्पन्न भइसकेको थियो। अमेरिकाले भेनेजुएलाका राष्ट्रपति निकोलस मादुरोलाई कब्जामा लिएकाे थियाे ।
अमेरिकी अधिकारीहरूका अनुसार मादुरोविरुद्ध चलाइएको यो उच्चस्तरीय सैन्य अभियान केही मिनेटमै पूरा गरिएको थियो। यस अपरेसनलाई “एब्सोल्युट रिजोल्भ” नाम दिइएको थियो, जसको तयारी धेरै महिनादेखि चलिरहेको थियो।
महिनौँको तयारी, ३० मिनेटमै अन्त्य
अमेरिकी अधिकारीहरूका अनुसार यो मिशनको योजना, अभ्यास र रिहर्सल लामो समयदेखि हुँदै आएको थियो। एकपटक सुरु भएपछि, यो अभियान ३० मिनेटभन्दा कम समयमा सम्पन्न भयो र केही घण्टामै मादुरोको शासन समाप्त भएको दाबी गरिएको छ।
अपरेसन सुरु हुनुअघि अमेरिकी सेनाले भेनेजुएलाको तट नजिक आफ्नो उपस्थितिलाई गोप्य रूपमा बढाएको थियो। गुप्तचर एजेन्सीहरूले मादुरोको दैनिक गतिविधिमा निरन्तर निगरानी गरिरहेका थिए।
समाचार एजेन्सी एपीको रिपोर्टअनुसार उनी कुन समयमा कहाँ हुन्छन्, उनका बानी–व्यवहार, कपडा, यहाँसम्म कि उनका पाल्तु जनावरसम्बन्धी जानकारीसमेत संकलन गरिएको थियो।
मादुरोको घरको हुबहु नक्कल तयार
राष्ट्रपति ट्रम्पका अनुसार अपरेसनको तयारीका लागि मादुरोको निवासको ठीक त्यस्तै नक्कली संरचना निर्माण गरिएको थियो। त्यसमा सबै सुरक्षा व्यवस्था र स्टिल संरचना समावेश गरिएको थियो। सम्भावित गल्तीबाट बच्न यस मोडेलमा पटक–पटक अभ्यास गरिएको थियो।
ट्रम्पले अपरेसनको क्रममा काराकास सहरको अधिकांश क्षेत्रमा बिजुली आपूर्ति बन्द गरिएको पनि बताए।
राति सुरु भएको हमला, आकाशमा अमेरिकी विमान
ट्रम्पले राति करिब १०:४६ बजे मिशनलाई अन्तिम स्वीकृति दिएका थिए। मौसम सफा भएपछि हेलिकप्टर र विमान उडानमा पठाइयो।
अमेरिकी सैन्य अधिकारीहरूका अनुसार हेलिकप्टरहरू समुद्र सतहको निकै नजिक उडाइएका थिए, ताकि रडारबाट बच्न सकियोस्। आकाशमा अमेरिकी लडाकु विमानहरूले सुरक्षा घेरा बनाएका थिए। रिपोर्टअनुसार १५० भन्दा बढी अमेरिकी विमान भेनेजुएलाको हवाई क्षेत्रमा प्रवेश गरेका थिए।
भाग्ने प्रयास असफल
अमेरिकी विशेष बल मादुरो रहेको सैन्य अड्डामा पुगे। भारी स्टिलका ढोका तोड्दै कमान्डो टोली भित्र पस्यो र मादुरो तथा उनकी पत्नी सिलिया फ्लोरेसलाई सुरक्षित कोठामा प्रवेश गर्नुअघि नै नियन्त्रणमा लियो।
ट्रम्पका अनुसार आवश्यकता परे स्टिल काट्न विशेष उपकरण पनि तयार राखिएको थियो, तर त्यो प्रयोग गर्नुपर्ने अवस्था आएन।
कब्जापछि अमेरिका लगियो
मादुरो र उनकी पत्नीलाई हेलिकप्टरमार्फत अमेरिकी युद्धपोतमा लगियो र त्यहाँबाट अमेरिका पठाइयो। ट्रम्प प्रशासनका अनुसार मादुरोमाथि न्यूयोर्कमा मुद्दा चलाइनेछ।
यस अपरेसनमा केही अमेरिकी सैनिक घाइते भए पनि कसैको मृत्यु नभएको ट्रम्पले दाबी गरेका छन्।
भेनेजुएलाको विरोध र अन्तर्राष्ट्रिय प्रतिक्रिया
भेनेजुएलाकी उपराष्ट्रपति डेल्सी रोड्रिगेजले यस हमलामा सर्वसाधारण र सैनिकको मृत्यु भएको दाबी गरेकी छिन् । उनले मादुरोलाई देशका वैध राष्ट्रपति भन्दै तुरुन्त रिहा गर्न माग गरिन्। साथै अमेरिकासँग वार्ताको सम्भावना खुला रहेको पनि बताइन्।
यस सैन्य कारबाहीको अमेरिका तथा विश्वका विभिन्न भागमा आलोचना भइरहेको छ। न्यूयोर्क सिटीका मेयर जोहरान ममदानीले यसलाई एकपक्षीय युद्ध भन्दै अन्तर्राष्ट्रिय कानुनको उल्लङ्घन भएको टिप्पणी गरेका छन्। एजेन्सीबाट
