वीरगन्ज,२१ पुस । वीरगन्जको छपकैया क्षेत्रस्थित ईदगाहचोकमा सोमबार एउटा मोटरसाइकलमा आगजनी भएको छ। स्थानीय स्रोतका अनुसार मुस्लिम समुदायका केही व्यक्तिहरूले मोटरसाइकलमा आगो लगाएका थिए। घटनापछि छेत्रको सुरक्षा अवस्था तनावपूर्ण बनेको छ। यसैबीच, हिन्दु धर्म, देवी–देवता, पर्व तथा मन्दिरहरूप्रति अभद्र टिप्पणी गर्ने व्यक्तिहरूमाथि कडा कारबाहीको माग गर्दै हिन्दु समाजको आह्वानमा हजारौँको सहभागितामा जुलुस र प्रदर्शन गरिएको छ।
स्थिति संवेदनशील बन्दै गएपछि जिल्ला प्रशासन कार्यालय, पर्साले वीरगन्जका मुख्य क्षेत्रहरूमा निषेधाज्ञा जारी गरेको छ। प्रशासनले दिउँसो १ बजेदेखि अर्को सूचना नआएसम्म कुनै पनि भेला, जुलुस, सभा वा प्रदर्शनमा पूर्ण प्रतिबन्ध लगाएको छ। निषेधाज्ञा लागू क्षेत्र पूर्वमा बसपार्क, पश्चिममा सिर्सिया पुल, उत्तरमा पावर हाउस चोक र दक्षिणमा शङ्कराचार्य गेटसम्म फैलिएको छ।
स्थिति नियन्त्रणमा राख्न जनपथ प्रहरी, सशस्त्र प्रहरी र नेपाली सेनाको टोली खटाइएको छ। यद्यपि, केही ठाउँमा प्रहरी र प्रदर्शनकारीबीच झडप जारी रहेको र प्रहरीले केही स्थानमा अश्रुग्याँस चलाएको छ। अर्कोतर्फ, घण्टाघर चोक, माइस्थान चोक, बसपार्क चोक लगायतका क्षेत्र शान्तिपूर्ण रहेका छन्। प्रशासनले सर्वसाधारणलाई संयम, सतर्कता अपनाउन, अफवाहमा नलाग्न र सुरक्षाकर्मीलाई सहयोग गर्न अपिल गरेको छ।
