वीरगञ्ज । वीरगञ्ज महानगरपालिका–१० स्थित बौधिमाई मन्दिर पछाडि रहेको आँपको रुखमा भगवान् श्री हनुमानजीको स्पष्ट आकृति देखिएपछि क्षेत्रभर धार्मिक उत्साह फैलिएको छ। आकृति दर्शनका लागि वीरगञ्जसहित पर्सा, बारा र सीमावर्ती भारतीय सहरहरूबाट हजारौँ श्रद्धालुहरूको भीड लाग्न थालेको छ।
आकृति पहिलो पटक बुधबार साँझ देखिएको बताइएको छ। स्थानीय एक महिलाले घाँस काट्ने क्रममा रुखको बोक्रामा श्री हनुमानजीको आकृति देखेपछि छिमेकीहरूलाई जानकारी गराएकी थिइन्। त्यसपछि साँझ करिब ५ बजेदेखि नै श्रद्धालुहरूको ओइरो लाग्न थालेको थियो।
बिहीबार बिहानैदेखि श्रद्धालुहरूको सङ्ख्या झनै बढेको छ। स्थानीयहरूले आकृतिलाई साक्षात् भगवान् श्री हनुमानजीको प्रकटीकरण मानेर रुखको फेदमा फूल, धूप, दीप र प्रसाद चढाउँदै पूजापाठ सुरु गरेका छन्।
बौधिमाई मन्दिरका पुजारी ददन ओझाले आकृति देखिएयता दिनरात श्रद्धालुहरूको भीड लागिरहेको जानकारी दिए। उनले यस घटनालाई भगवान्को कृपाका रूपमा व्याख्या गर्दै श्रद्धालुहरूलाई दर्शनका लागि आउन आग्रह गरेका छन्।
वडा नं. १० का वडाध्यक्ष सुशील कुमार कानुले धार्मिक आस्थाको सम्मान गर्दै आकृतिको संरक्षणमा ध्यान दिइने बताए। श्रद्धालुहरूको सुविधा र व्यवस्थापनका लागि वडा कार्यालय तयारी अवस्थामा रहेको उल्लेख गर्दै दीर्घकालीन रूपमा महानगरपालिकासँग समन्वय गरी संरक्षण तथा मन्दिर निर्माणको कार्यक्रम अघि बढाउन सकिने उनको भनाइ छ।
श्रद्धालु तथा स्थानीय अगुवाहरूले आकृतिको संरक्षण गर्दै सो स्थानमा भव्य हनुमान मन्दिर निर्माण गर्न माग गरेका छन्। उनीहरूका अनुसार यसले धार्मिक आस्थासँगै पर्यटकीय महत्त्वसमेत बढाउनेछ।
घटनाले वीरगञ्जमा धार्मिक उत्साह र एकताको वातावरण सिर्जना गरेको छ। श्रद्धालुहरूको सङ्ख्या बढ्दै गएकाले सुरक्षा र व्यवस्थापनतर्फ पनि ध्यान दिनुपर्ने देखिएको छ।
