जनकपुर,२५ पुस । आउँदो प्रतिनिधि सभा निर्वाचनका लागि महोत्तरी जिल्लामा तीन हजार ९१२ जनालाई निर्वाचन प्रहरीका रूपमा भर्ना गरिने भएको छ।
निर्वाचन प्रहरी छनोट तथा नियुक्ति समिति महोत्तरीले आज जारी गरेको सूचनामा उक्त संख्यामा निर्वाचन प्रहरी भर्ना गर्न लागिएको जानकारी दिएको छ। प्रमुख जिल्ला अधिकारी इन्द्रदेव यादवद्वारा जारी सूचनामा भनिएको छ कि भर्ना, छनोट, नियुक्ति र परिचालन कार्य “नेपाल प्रहरी (सशस्त्र प्रहरी बल, नेपाल) कार्यविधि २०८२” अनुसार सञ्चालन गरिनेछ।
महोत्तरीमा चार निर्वाचन क्षेत्र रहेका छन्। आगामी निर्वाचनका लागि २५८ मतदान स्थल, ५३६ मतदान केन्द्र, र चार लाख ३१ हजार २८२ मतदाता कायम भएका छन्। निर्वाचन प्रहरीको भर्नाले मतदान केन्द्रमा सुरक्षा सुनिश्चित गर्दै निर्वाचन शान्तिपूर्ण, निष्पक्ष र व्यवस्थित सञ्चालनमा सहयोग पुग्ने अपेक्षा गरिएको छ।
