काठमाडौं । निर्वाचन आयोगले आसन्न प्रतिनिधिसभा सदस्य निर्वाचनका लागि बुझाएको समानुपातिक सूचीमा समेटिएका १६४ उम्मेदवारले नाम फिर्ता लिएको जनाएको छ ।
यही पुस १३, १४ र १५ गते विभिन्न राजनीतिक दलहरुले समानुपातिक तर्फको उम्मेदवारको बन्दसूची आयोगमा बुझाएका थिए । आयोगले सोमबार (पुस २८)गतेसम्म उम्मेदवारी फिर्ता तथा त्रुटि सच्याउन उम्मेदवार र दलहरुलाई समय दिएको थियो ।
सोही क्रममा विभिन्न १८ राजनीतिक दलका १६४ उम्मेदवारले आ–आफ्नो नाम फिर्ता लिएका हुन् । सोमबारसम्म नाम फिर्ता लिएका उम्मेदवारबारे आयोगले मंगलबार अपरान्ह ४ बजेसम्म सम्बन्धित राजनीतिक दललाई जानकारी गराउने भएको छ ।
नाम फिर्ता लिएपछि रिक्त भएको स्थानमा यही पुस ३० देखि माघ २ गतेसम्म अर्को उम्मेदवारको मनोनयन गरी सम्बन्धित दलले आयोगमा बुझाउनुपर्नेछ । विभिन्न कार्यक्रमपछि आयोगले माघ २० गते भने समानुपातिक उम्मेदवारको बन्दसूचीलाई अन्तिम रूप दिनेछ ।
कुन दलबाट कति उम्मेदवार बाहिरिए ?
समानुपातिक उम्मेदवारको बन्दसूचीबाट सोमबार (पुस २८)सम्म १८ राजनीतिक दलका १६४ जना उम्मेदवारले नाम फिर्ता लिएका छन् । सबैभन्दा धेरै लोकतान्त्रिक समाजवादी पार्टी (लोसपा)बाट ७८ जनाले उम्मेदवारी फिर्ता लिएका छन् ।
लोकतान्त्रिक समाजवादी पार्टी – ७८
जनता समाजवादी पार्टी नेपाल – २१
जनमत पार्टी – २०
राष्ट्रिय प्रजातन्त्र पार्टी – १२
जनादेश पार्टी नेपाल – ६
नेकपा (एमाले) – ५
नेपाल कम्युनिस्ट पार्टी (माओवादी) – ४
राष्ट्र निर्माण दल नेपाल – ४
नेपाली कांग्रेस – २
नेपाली कम्युनिस्ट पार्टी (नेकपा) – २
राष्ट्रिय स्वतन्त्र पार्टी (रास्वपा) – २
उन्नत लोकतान्त्रिक पार्टी – २
गतिशील लोकतान्त्रिक पार्टी – १
नागरिक उन्मुक्ति पार्टी – १
नेपाल जनता पार्टी – १
प्रगतिशील लोकतान्त्रिक पार्टी – १
संघीय लोकतान्त्रिक पार्टी – १
संयुक्त नागरिक पार्टी – १
