काठमाडौं, २९ पुस । नेपाली कांग्रेसको विशेष महाधिवेशनका लागि निर्वाचन समितिले निर्वाचन तालिका सार्वजनिक गर्दै मनोनयन आह्वान गरेको छ।
निर्वाचन समितिका संयोजक वरिष्ठ अधिवक्ता सीताराम केसीले आज सूचना जारी गर्दै उम्मेदवारी पेश गर्न आह्वान गरेका हुन्। त्यस्तै, समितिले महाधिवेशन प्रतिनिधिहरूको मतदाताको नामावली पनि सार्वजनिक गरेको छ।
कांग्रेसमा हालसम्म महाधिवेशन प्रतिनिधिको संख्या ४७४३ रहेको छ। तीमध्ये पार्टी परित्याग गर्ने ६१ जना र मृत्यु भएका ४४ जना प्रतिनिधिहरू बाहेक, अहिले कुल ४६३८ प्रतिनिधि मतदानमा सहभागी हुन सक्ने छन्।
विशेष महाधिवेशन मूल आयोजन समिति संयोजक मनोजमणि आचार्यले भने, ‘एकै समयमा तीनवटा काम भइरहेकै छन्। बन्दसत्र जारी छ, वार्ता–संवाद भइरहेको छ। निर्वाचन कार्यतालिका प्रकाशित गरेर निर्वाचनको काम अघि बढेको छ। संवाद सकारात्मक भए ठिक छ, नभए नयाँ कार्यसमिति गठन हुनेछ।’
