काठमाडौं । नेपाली कांग्रेसभित्रको विवाद समाधानका लागि शीर्ष तहमै छलफल सुरु भएको छ । आइतबारदेखि भृकुटीमण्डपमा दोस्रो विशेष महाधिवेशन चलिरहँदा संस्थापन समूह र विशेष महाधिवेशन पक्षधरबिच पनि वार्ता भइरहेको थियो ।
दुवै समूहको वार्ता टोलीबिचको संवादमा सहमति नजुटेपछि बुधबार बिहान सभापति शेरबहादुर देउवा र महामन्त्रीद्वय गगन थापा र विश्वप्रकाश शर्माबिच छलफल भएको छ । महाराजगञ्जस्थित देउवा निवासमा उनीहरुबिच संवाद भएको हो ।
छलफलका क्रममा गगन–विश्वले सभापति देउवालाई सक्रिय राजनीतिबाट अवकाश लिन आग्रह गरे । जवाफमा देउवाले कुनै प्रतिक्रिया जनाएनन् । बरु देउवाले आगामी महाधिवेशनबाट आफू नेतृत्वमा नरहने र विधानले पनि नदिने स्मरण गराए ।
केन्द्रीय कार्यसम्पादन समितिले आगामी वैशाखमा नियमित महाधिवेशन गर्ने निर्णय गरिसकेको र यही महाधिवेशनबाटै आफूले नेतृत्व छाड्ने घोषणा गरिसकेकाले अहिले विवादमा अल्झिनु नहुने देउवाले महामन्त्रीद्वय गगन–विश्वलाई बताए । सभापति देउवाले यो तीन महिनामा हुने के नै छ र ? भन्दै सहमतिमा आउन आग्रह गरे ।
तर, निर्वाचन आयोग र कानुनले दिएमा आफू आगामी निर्वाचनमा उम्मेदवारको टिकट वितरणमा हस्ताक्षर नगर्न राजी भएको भन्दै देउवाले लचकता देखाएको एक नेताले जानकारी दिए ।
गगन–विश्वलाई सभापति देउवाले राष्ट्रिय सभाको उम्मेदवारको टिकट वितरणमा र प्रतिनिधिसभाको समानुपातिकको बन्दसूचीमा आफ्नो हस्ताक्षर भएकाले अब प्रत्यक्षको टिकट वितरणमा अर्को व्यक्तिको हस्ताक्षर गर्न मिल्ने भए आफू तयार रहेको बताएका हुन् ।
सभापति देउवासँग महामन्त्रीद्वय गगन र विश्वप्रकाश विशेष महाधिवेशन पक्षधरसँग छलफल गरेर पुनः वार्तामा बस्ने भन्दै देउवा निवासबाट बाहिरिएका छन् ।
