वीरगञ्ज, ३० पुष । नेपाली कांग्रेसको संस्थापन समूहले दुई महामन्त्री र एक सहमहामन्त्रीलाई पाँच वर्षका लागि पार्टीबाट निष्कासन गर्ने निर्णय गरेसँगै पार्टी विभाजनतर्फ उन्मुख भएको संकेत देखिएको छ।
बुधबार पार्टी केन्द्रीय कार्यालय सानेपामा बसेको संस्थापन पक्षको केन्द्रीय समिति बैठकले महामन्त्री गगन थापा र विश्वप्रकाश शर्मा तथा सहमहामन्त्री फर्मुल्लाह मनसुरलाई साधारण सदस्यसमेत नरहने गरी पाँच वर्षका लागि पार्टीबाट निष्कासन गर्ने घोषणा गरेको हो।
निर्णय सार्वजनिक भएसँगै कांग्रेसभित्रको आन्तरिक विवाद थप चर्किएको छ। निष्कासित नेताहरू निकट समूहले उक्त निर्णयलाई अस्वीकार गर्दै पार्टी विधान र लोकतान्त्रिक मूल्यविपरीत भएको प्रतिक्रिया दिएका छन्।
यसैबीच, विशेष महाधिवेशनको माग गर्दै आएको पक्षले काठमाडौँको भृकुटीमण्डपमा नयाँ नेतृत्व चयन गर्ने तयारी थालेको स्रोतले जनाएको छ। पार्टीभित्रको यो टकरावले नेपाली कांग्रेस औपचारिक विभाजनतर्फ जान सक्ने अड्कलहरू समेत सुरु भएका छन्।
