बीरगन्ज,०८ माघ । मुलुकको प्रमुख व्यापारिक नाका बीरगन्जबाट चालु आर्थिक वर्षको पहिलो छ महिनामा हुने निर्यातमा उल्लेख्य सुधार देखिएको छ। बीरगन्ज भन्सार कार्यालयको तथ्याङ्कअनुसार यस अवधिमा ४८ अर्ब १० करोड रुपैयाँ बराबरका स्वदेशी वस्तु विदेशी बजारमा निर्यात भएका छन्।
यो रकम गत आर्थिक वर्षको सोही अवधिको तुलनामा ५२ प्रतिशतले बढी हो। अघिल्लो वर्षको पहिलो छ महिनामा बीरगन्ज नाकाबाट ३१ अर्ब ६७ करोड रुपैयाँ बराबरको मात्रै निर्यात भएको थियो।
भन्सार कार्यालयका सूचना अधिकारी उदयसिंह विष्टका अनुसार निर्यातमा देखिएको यो वृद्धि मुलुकको वैदेशिक व्यापार सन्तुलनका लागि सकारात्मक संकेत हो। उनका अनुसार बीरगन्ज नाकाबाट निर्यात हुने वस्तुहरूमा प्रशोधित खाद्य तेलको हिस्सा सबैभन्दा बढी रहेको छ। तथ्याङ्कअनुसार छ महिनामा २५ अर्ब ४२ करोड रुपैयाँ बराबरको प्रशोधित भटमासको तेल निर्यात भएको छ। यसका साथै ३ अर्ब ५५ करोड रुपैयाँको सूर्यमुखी तेल र २ अर्ब २५ करोड रुपैयाँ बराबरको पाम तेल पनि विदेश पठाइएको छ।
खाद्य सामग्रीसँगै औद्योगिक उत्पादनको निर्यातमा पनि बीरगन्ज नाका सक्रिय देखिएको छ। यस अवधिमा ३ अर्ब ४८ करोड रुपैयाँ मूल्य बराबरको फलफूलको जुस तथा १ अर्ब ७८ करोड रुपैयाँ बराबरका विभिन्न किसिमका कपडाहरू निर्यात भएका छन्। कच्चा पदार्थ आयात गरी नेपालमै प्रशोधन गरेर पुनः निर्यात गरिने वस्तुको अन्तर्राष्ट्रिय माग बढेसँगै बीरगन्ज नाकाबाट हुने व्यापारिक गतिविधि थप बढेको भन्सार कार्यालयले जनाएको छ।
