काठमाडौँ,०८ माघ । नेकपा एमालेका अध्यक्ष केपी शर्मा ओलीले जेनजी आन्दोलनको नाममा आगजनी, तोडफोड तथा लुटपाटजस्ता आपराधिक गतिविधिमा संलग्न जो–कोही पनि कानुनी कारबाहीको दायरामा आउने स्पष्ट गरेका छन्।
बिहीबार झापाको दमक–८ स्थित नेकपाका नेता गगन पुरीको आगजनी गरिएको घरको अवलोकन गर्दै अध्यक्ष ओलीले अराजक गतिविधि कुनै पनि बहानामा स्वीकार्य नहुने बताए। उनले भने, “आन्दोलनको नाममा हुने अपराधको आयु लामो हुँदैन। दोषीमाथि कानूनअनुसार कारबाही हुन्छ।”
आगजनीपछि सामान्य मर्मत गरेर घरमै बसोबास गरिरहेका नेता पुरीलाई आश्वस्त पार्दै ओलीले उजुरी–निवेदनसहित कानुनी प्रक्रिया अगाडि बढाउन सुझाव दिए। उनले राज्यले शान्ति र कानूनी शासन कायम गर्न आवश्यक कदम चाल्ने पनि बताए।
यस क्रममा नेता पुरीले घटनासँग सम्बन्धित सबै प्रमाण सङ्कलन गरिसकेको र कानुनी उपचारको प्रक्रिया अघि बढाइसकेको जानकारी दिए। उनका अनुसार आगजनी र तोडफोडका क्रममा घरभित्रका सामान जलाइएको, सम्पत्ति लुटिएको र घरमा व्यापक क्षति पुर्याइएको छ।
