काठमाडौँ । नेकपा (एमाले) अध्यक्ष तथा पूर्व प्रधानमन्त्री केपी शर्मा ओलीले देशका लागि फेरि जिम्मेवारी लिन आफू तयार रहेको संकेत गरेका छन् । सामाजिक सञ्जाल फेसबुकमार्फत धारणा सार्वजनिक गर्दै ओलीले अहिलेको सरकार असफल भएको दाबी गर्दै देशलाई सही दिशामा लैजान अनुभवी नेतृत्व आवश्यक रहेको बताएका छन् ।
ओलीले वर्तमान सरकारले राष्ट्रलाई निराशाको खाडलतर्फ धकेलेको आरोप लगाउँदै राजनीतिक स्थायित्व, सुशासन र राष्ट्रिय हितका लागि आफू पुनः सक्रिय भूमिकामा आउन तयार रहेको स्पष्ट पारेका छन् । उनले विगतमा आफूले सुरु गरेका विकास र राष्ट्रिय स्वाभिमानका मुद्दाहरूलाई कमजोर पार्ने षड्यन्त्र भइरहेको उल्लेख गर्दै त्यसविरुद्ध लड्न आवश्यक रहेको बताए ।
उनको उक्त स्टाटसपछि काठमाडौँ महानगरपालिकाका मेयर बालेन शाहले कडा प्रतिक्रिया जनाएका छन् । बालेनले ओलीको स्टाटसमा टिप्पणी गर्दै देश चलाउने नाममा जनतालाई पटक–पटक भ्रममा पारिएको आरोप लगाए । उनले विगतको शासनकाल स्मरण गराउँदै “देश चलाएको अनुभव” भन्ने दाबीमाथि प्रश्न उठाएका छन् ।
बालेन शाहले टिप्पणीमा राजनीतिक नेतृत्वले आत्मआलोचना गर्न नसक्दा देश पछाडि परेको संकेत गर्दै पुरानो सोच र पुरानै पात्रबाट देशको भविष्य सम्भव नहुने धारणा व्यक्त गरेका छन् । साथै, उनले भ्रष्टाचार, कुशासन र सत्ता मोहकै कारण देशले पीडा भोगिरहेको उल्लेख गरेका छन् ।
ओलीको स्टाटस र त्यसमा बालेन शाहको प्रतिक्रिया सार्वजनिक भएपछि सामाजिक सञ्जालमा व्यापक बहस सुरु भएको छ । समर्थक र आलोचकबीच तीव्र मतभेद देखिएको छ भने यो घटनालाई आगामी राजनीतिक समीकरण र चुनावी माहोलसँग जोडेर हेरिएको छ ।
राजनीतिक विश्लेषकहरूका अनुसार यो बहस केवल सामाजिक सञ्जालको वाकयुद्ध मात्र नभई आगामी दिनमा पुराना दलका नेतृत्व र नयाँ पुस्ताको प्रतिनिधित्व गर्ने पात्रहरूबीचको राजनीतिक टकरावको संकेतसमेत हो ।
