बारा, १२ माघ । राष्ट्रिय स्वतन्त्र पार्टी (रास्वपा) का उम्मेदवार ई. अरविन्द साहले बाराको निर्वाचन क्षेत्र नम्बर ३ मा आफ्नो चुनावी अभियान महागढीमाई मन्दिरमा दर्शन गर्दै औपचारिक रूपमा सुरु गरेका छन्।
साह सफल उद्यमी तथा व्यवसायीका रूपमा परिचित छन्। उनी देशकै अग्रणी डिजिटल वालेट एप ‘खल्ती’ सञ्चालन गर्दै हजारौँ युवालाई प्रत्यक्ष रोजगारी प्रदान गरिसकेका छन्। यसपटक बारा–३ बाट उम्मेदवारी दर्ता गरेका साहले रोजगारी सृजना, स्वास्थ्य सेवा सुधार, शिक्षा सुधार र समग्र समृद्धिलाई आफ्नो प्रमुख एजेन्डा बनाएका छन्।
अभियानको सुरुवातमा साहसँगै रास्वपाका वरिष्ठ नेता बालेन्द्र शाह (बालेन) का दाजु कौशलेन्द्र शाह पनि उपस्थित थिए। मन्दिर दर्शनपछि स्थानीय बासिन्दासँग अन्तरक्रिया गर्दै कौशलेन्द्र शाहले विकास, परिवर्तन र समृद्धिका लागि रास्वपालाई जिताउन आग्रह गरे। उनले बालेन्द्र शाहले तीन वर्षको कार्यकालमा विभिन्न चुनौती र अवरोधका बाबजुद काठमाडौँमा आमूल परिवर्तन ल्याएको उदाहरण दिँदै भने, “प्रधानमन्त्री बनेपछि देशले नै काँचुली फेर्नेछ।”
उम्मेदवार साहले पनि बाराको समृद्धिका लागि आफ्नो उम्मेदवारी जोड दिए। उनले भने, “इतिहासमा बारा जिल्लाको नाम सुवर्ण अक्षरमा लेखिएको थियो, तर अहिले यो धुमिल हुँदै गएको छ।”
साहले महागढीमाई मन्दिर क्षेत्रको विकासमा अहिलेसम्म ठोस योजना नआएकोमा दुःख व्यक्त गर्दै, मन्दिरको प्रचार–प्रसार, संरक्षण र यसलाई पर्यटकीय हबका रूपमा विकास गरी जिल्लाको आर्थिक उन्नतिमा योगदान दिन सकिने बताए।
