वीरगंज, १ फागुन — पर्सा जिल्लाको निर्वाचन क्षेत्र नम्बर–४ बाट नेपाली कांग्रेसका प्रतिनिधिसभा सदस्य उम्मेदवार रमेश रिजालले आफ्नो चुनावी प्रचार अभियानलाई तीव्रता दिँदै आज कालिकामाई गाउँपालिका वडा नम्बर–४ कट्टी बालुवा तथा वडा नम्बर–३ हरिहरपुर बिर्ता क्षेत्रमा उत्साहजनक घरदैलो कार्यक्रम सम्पन्न गरेका छन्।
घरदैलोका क्रममा उम्मेदवार रिजालले स्थानीय मतदातासँग प्रत्यक्ष भेटघाट गर्दै उनीहरूको समस्या, आवश्यकता र अपेक्षाबारे विस्तृत जानकारी लिएका थिए। कृषक, युवा, महिला तथा ज्येष्ठ नागरिकसँग छुट्टाछुट्टै छलफल गर्दै उनले स्थानीय स्तरमा देखिएका सडक, सिंचाइ, स्वास्थ्य चौकी, विद्यालय पूर्वाधार तथा बेरोजगारी जस्ता विषयमा प्राथमिकताका साथ काम गर्ने प्रतिबद्धता व्यक्त गरे।
रिजालले समावेशी विकास, गुणस्तरीय शिक्षा, सहज स्वास्थ्य सेवा, युवाका लागि रोजगारी सिर्जना तथा आधारभूत पूर्वाधार सुधारलाई आफ्नो मुख्य एजेण्डा बनाएको उल्लेख गरे। “जनताको विश्वास नै मेरो शक्ति हो। यहाँको विकास र समृद्धिका लागि म प्रतिबद्ध छु,” उनले भने।
स्थानीय बासिन्दाले आफ्नो टोलमा उम्मेदवारलाई स्वागत गर्दै विगतमा भएका विकास प्रयासहरूको चर्चा गरेका थिए। उनीहरूले आगामी निर्वाचनमा सक्रिय सहयोग गर्ने विश्वास दिलाउँदै क्षेत्रको दीर्घकालीन विकासका लागि ठोस पहलको अपेक्षा व्यक्त गरे।
कार्यक्रममा कांग्रेस पर्साका प्रवक्ता रमेश पाण्डे, सहसचिव नवीन सिंह, क्षेत्रीय सभापति श्रीकान्त प्रसाद यादव, नेता सहरुम राउत गद्दी, अजय पटेल, राधाकिशुन चौधरी लगायतका स्थानीय नेता तथा कार्यकर्ताहरूको उल्लेखनीय सहभागिता रहेको थियो। उपस्थित नेताहरूले गाउँ–गाउँमा बढ्दो जनसहभागिताले कांग्रेसको अभियान थप सशक्त बन्दै गएको दाबी गरे।
