काठमाडौं,०७ फागुन । आज फागुन ७ गते देशभर ७५औँ राष्ट्रिय प्रजातन्त्र दिवस विविध कार्यक्रमका साथ मनाइँदै छ। २००७ सालको जनक्रान्तिमार्फत १०४ वर्षे राणा शासन अन्त्य भई देशमा प्रजातन्त्र स्थापना भएको ऐतिहासिक दिनको स्मरणमा यो दिवस हरेक वर्ष मनाउने गरिन्छ।
प्रजातन्त्र स्थापना गर्न आफ्नो अमूल्य जीवन बलिदान गर्ने शहीदहरू दशरथ चन्द, धर्मभक्त माथेमा, गङ्गालाल श्रेष्ठ र शुक्रराज शास्त्री प्रति श्रद्धाञ्जली अर्पण गर्दै विभिन्न सरकारी तथा गैरसरकारी निकायहरूले कार्यक्रम आयोजना गरेका छन्।
मूल समारोह काठमाडौंस्थित सैनिक मञ्च मा विशेष कार्यक्रमका साथ आयोजना हुँदैछ। प्रधानमन्त्री सुशीला कार्कीको अध्यक्षतामा गठित मूल समारोह समितिमा नेपाल सरकारका मन्त्रीहरू, काठमाडौँ उपत्यकाका नगरप्रमुखहरू, मुख्य सचिव, प्रधानसेनापति तथा सुरक्षा निकायका प्रमुखहरू लगायत उच्च पदाधिकारीहरू सदस्य रहेका छन्। गृह मन्त्रालयका सचिव सदस्य–सचिवका रूपमा कार्यरत छन्।
यस अवसरमा सरकारले देशभर सार्वजनिक बिदा घोषणा गरेको छ। राष्ट्रपति, प्रधानमन्त्री तथा विभिन्न राजनीतिक दलका नेताहरूले पनि शुभकामना सन्देश जारी गर्दै लोकतान्त्रिक मूल्य, नागरिक अधिकार र विधिको शासनलाई अझ सुदृढ बनाउने प्रतिबद्धता व्यक्त गरेका छन्।
प्रजातन्त्र दिवसले बलिदान र संघर्षको इतिहासलाई स्मरण गराउँदै लोकतन्त्र सुदृढ बनाउन सबै पक्षलाई एकताबद्ध भई अघि बढ्न प्रेरित गर्ने विश्वास गरिएको छ।
