सुर्खेत,११ चैत । वीरेन्द्रनगरकी १६ वर्षीया इनिशा विकको मृत्यु प्रकरणमा प्रहरीले अनुसन्धान प्रतिवेदन जिल्ला सरकारी वकिल कार्यालयमा बुझाएको छ।
जिल्ला प्रहरी कार्यालय सुर्खेतले बुधबार अनुसन्धान प्रक्रिया सम्पन्न गरी प्रतिवेदन पेश गरेको हो।
गत फागुन २३ गते वीरेन्द्रनगर नगरपालिका–१ मा इनिशा मृत अवस्थामा फेला परेकी थिइन्। घटनापछि प्रहरीले एक १६ वर्षीय किशोरलाई नियन्त्रणमा लिएर अनुसन्धान सुरु गरेको थियो। यसक्रममा संलग्नताको आशंकामा अन्य तीन जनालाई पनि पक्राउ गरिएको थियो।
जिल्ला प्रहरी कार्यालयका प्रमुख सुधीरराज शाहीले प्रतिवेदन बुझाइएको पुष्टि गरे पनि यसको निष्कर्षबारे खुलाउन चाहेनन्।
प्रहरीले अनुसन्धानको निष्कर्ष सार्वजनिक नगरेपछि पीडित परिवारले असन्तुष्टि जनाएको छ। परिवारले घटनामा गम्भीर अपराध भएको दाबी गर्दै दोषीमाथि कारबाही नभएसम्म शव नबुझ्ने अडान लिएको छ।
हाल इनिशाको शव कर्णाली प्रदेश अस्पतालको शवगृहमा राखिएको छ, जहाँ १९ दिनदेखि सुरक्षित राखिएको छ।
घटनाको आधिकारिक निष्कर्ष सार्वजनिक हुन बाँकी रहेकाले यो प्रकरणप्रति जनचासो अझै कायम रहेको छ। अब सरकारी वकिल कार्यालयको निर्णयले घटनाको कानुनी प्रक्रिया अगाडि बढ्नेछ।
