चितवन,१७ चैत । एभियन इन्फ्लुएन्जा (बर्ड फ्लु) संक्रमण पुष्टि भएपछि चितवनको भरतपुर महानगरपालिका क्षेत्रमा उच्च सतर्कता अपनाइएको छ। संक्रमण फैलिन नदिन १८ हजारभन्दा बढी कुखुरा नष्ट गरिएको छ।
पशु सेवा विभाग का अनुसार प्रभावित फार्ममा कुखुराहरू अचानक मर्न थालेपछि गरिएको प्रयोगशाला परीक्षणमा बर्ड फ्लु पुष्टि भएको हो। त्यसलगत्तै प्राविधिक टोलीले प्रभावित क्षेत्रलाई केन्द्रमा राखेर ‘किलिङ, डिस्पोजल र डिसइन्फेक्सन’ प्रक्रिया सुरु गरेको छ।
संक्रमण नियन्त्रणका लागि प्रभावित क्षेत्र वरपर निश्चित दूरीभित्र रहेका कुखुरा, चल्ला, अण्डा तथा दानासमेत नष्ट गरी सुरक्षित रूपमा व्यवस्थापन गरिएको छ। साथै, जिल्ला प्रशासन कार्यालय चितवन ले उक्त क्षेत्रलाई ‘नियन्त्रित क्षेत्र’ घोषणा गर्दै कुखुरा तथा कुखुराजन्य उत्पादनको ओसारपसारमा अस्थायी प्रतिबन्ध लगाएको छ।
अधिकारीहरूले बर्ड फ्लु अत्यन्तै संक्रामक रोग भएकाले समयमै नियन्त्रण नगरे पोल्ट्री क्षेत्रमा ठूलो आर्थिक क्षति हुन सक्ने चेतावनी दिएका छन्।
यसैबीच, सम्बन्धित निकायहरूले किसान तथा व्यवसायीलाई उच्च जैविक सुरक्षा अपनाउन आग्रह गरेका छन्। कुखुरामा असामान्य व्यवहार, अचानक मृत्यु वा अन्य लक्षण देखिएमा तुरुन्त नजिकको पशु सेवा कार्यालयमा जानकारी गराउन अनुरोध गरिएको छ।
सरकारले प्रभावित किसानहरूलाई प्रचलित मापदण्डअनुसार क्षतिपूर्ति उपलब्ध गराउने प्रक्रिया अघि बढाइने जनाएको छ। साथै, रोग नियन्त्रणका लागि आवश्यक प्राविधिक जनशक्ति, औषधि तथा सामग्री प्रभावित क्षेत्रमा परिचालन गरिसकिएको छ।
