काठमाडौं,०२ जेठ । आईसीसी विश्वकप लिग–२ अन्तर्गत त्रिकोणात्मक सिरिजमा संयुक्त राज्य अमेरिका राष्ट्रिय क्रिकेट टोलीले घरेलु टोली नेपाल राष्ट्रिय क्रिकेट टोलीसामु १ सय ९६ रनको लक्ष्य प्रस्तुत गरेको छ।
कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको अमेरिकाले ४३.३ ओभरमा १ सय ९५ रन बनाउँदै अलआउट भयो। अमेरिकाका लागि ओपनर स्मित पटेलले उत्कृष्ट ८३ रन बनाए। उनले ८९ बलमा ८ चौका र ३ छक्का प्रहार गरे। दोस्रो विकेटका लागि स्मित र सेहनान जयसूर्याबीच १ सय रनको महत्वपूर्ण साझेदारी भएको थियो। सेहनानले ५२ बलमा ५ चौका र १ छक्का सहित अर्धशतक पूरा गरे।
नेपालका लागि दीपेन्द्रसिंह ऐरीले उत्कृष्ट बलिङ गर्दै ४ विकेट लिए। उनले ७.३ ओभरमा मात्र २४ रन खर्चिँदै अमेरिकालाई ठूलो स्कोर बनाउनबाट रोके।
यस्तै सोमपाल कामीले २ विकेट लिए भने सन्दीप लामिछाने र गुल्सन झाले समान १–१ विकेट हात पारे। अमेरिकाका अन्य ब्याट्सम्यानले ठूलो योगदान दिन नसक्दा टोली मध्यम स्कोरमै सीमित भयो।
अब नेपालले केही बेरमा १९६ रनको लक्ष्य पछ्याउँदै जवाफी ब्याटिङ गर्नेछ।
