बीरगन्ज,२२ जेठ । हरि खेतान बहुमुखी क्याम्पसमा नवनियुक्त पदाधिकारीहरूको स्वागत तथा परिचयात्मक कार्यक्रम भव्य रूपमा सम्पन्न भएको छ। क्याम्पस सभाहलमा आयोजित कार्यक्रममा पदाधिकारीहरूको औपचारिक स्वागतसँगै क्याम्पसको व्यवस्थापन, शैक्षिक गतिविधि तथा संस्थागत विकासका विविध पक्षमा विस्तृत छलफल गरिएको थियो।
कार्यक्रममा क्याम्पस व्यवस्थापन समितिका अध्यक्ष डा. रामऔतार खेतान, उपाध्यक्ष हरि प्रसाद गौतम, सदस्य सचिव किशोरी राय तथा सल्लाहकार जय प्रकाश खेतानलगायत पदाधिकारीहरूको उल्लेखनीय उपस्थिति रहेको थियो। कार्यक्रममा सहभागीहरूलाई क्याम्पसको वर्तमान अवस्था, सञ्चालन भइरहेका शैक्षिक कार्यक्रम तथा आगामी योजनाबारे जानकारी गराइएको थियो।
कार्यक्रमलाई सम्बोधन गर्दै अध्यक्ष डा. रामऔतार खेतानले हरि खेतान बहुमुखी क्याम्पसलाई प्रदेशकै अग्रणी शैक्षिक संस्थाका रूपमा स्थापित गर्ने लक्ष्यसहित अघि बढ्नुपर्ने आवश्यकता औंल्याए। उनले गुणस्तरीय शिक्षा प्रदान गर्दै दक्ष जनशक्ति उत्पादन र विद्यार्थीमैत्री वातावरण निर्माणलाई प्राथमिकतामा राखिने बताए।
उपाध्यक्ष हरि प्रसाद गौतमले क्याम्पसको शैक्षिक तथा भौतिक पूर्वाधार विकासलाई मुख्य प्राथमिकतामा राखेर कार्य गरिने प्रतिबद्धता व्यक्त गरे। उनले विद्यार्थी, शिक्षक तथा कर्मचारीबीच आपसी समन्वय र सहकार्यलाई थप सुदृढ बनाउँदै संस्थाको समग्र विकासमा योगदान पुर्याइने बताए।
सदस्य सचिव किशोरी रायले प्रशासनिक कार्यलाई थप प्रभावकारी, पारदर्शी र उत्तरदायी बनाउने लक्ष्य रहेको उल्लेख गर्दै शैक्षिक गतिविधिलाई समयसापेक्ष तथा परिणाममुखी बनाइने धारणा व्यक्त गरे।
त्यसैगरी, सल्लाहकार जय प्रकाश खेतानले क्याम्पसको दीर्घकालीन विकासका लागि सबै सरोकारवालाबीच सहकार्य अपरिहार्य रहेको बताए। उनले शैक्षिक गुणस्तर अभिवृद्धि, अनुसन्धानमूलक गतिविधि तथा अतिरिक्त क्रियाकलापलाई प्रोत्साहन गर्नुपर्नेमा जोड दिए।
कार्यक्रममा सहभागी पदाधिकारीहरूले क्याम्पसको हित, शैक्षिक उत्कृष्टता र संस्थागत विकासलाई केन्द्रमा राख्दै आगामी दिनमा समर्पित भावनाका साथ कार्य गर्ने प्रतिबद्धता व्यक्त गरेका थिए।
कार्यक्रमको अन्त्यमा नवनियुक्त पदाधिकारीहरूलाई बधाई ज्ञापन गर्दै सफल कार्यकालको शुभकामना व्यक्त गरिएको थियो।
