वीरगञ्ज, १२ असार – नेशनल मेडिकल कलेज, वीरगञ्जको आयोजनामा तथा इन्स्टिच्युट अफ मेडिसिन (IOM), काठमाडौंको चिकित्सा शिक्षा विभागको सहकार्यमा सञ्चालन गरिएको ६ दिने फ्याकल्टी डेभलपमेन्ट ट्रेनिङ (Faculty Development Training–FDT) सफलतापूर्वक सम्पन्न भएको छ। ७ देखि १२ असार २०८३ सम्म सञ्चालित उक्त तालिम चिकित्सा शिक्षाको गुणस्तर अभिवृद्धि गर्नुका साथै शिक्षकहरूको शिक्षण दक्षता र व्यावसायिक क्षमता सुदृढ गर्ने उद्देश्यले आयोजना गरिएको थियो।
कलेजको IBMS ब्लकस्थित कन्फरेन्स हलमा आयोजित समापन समारोहको अध्यक्षता नेशनल मेडिकल कलेजका प्रिन्सिपल प्रा. डा. के.एन. सिंहले गर्नुभएको थियो। समारोहमा कलेजका अध्यक्ष प्रा. डा. जैनुद्दीन अन्सारी प्रमुख अतिथिका रूपमा उपस्थित हुनुहुन्थ्यो। साथै इन्स्टिच्युट अफ मेडिसिनका प्रा. डा. निर्जु रञ्जित, प्रा. डा. संघरत्न बज्राचार्य तथा प्रा. डा. रमेश आचार्य विशिष्ट अतिथिका रूपमा सहभागी हुनुभएको थियो।
कार्यक्रममा अस्पताल निर्देशक डा. इशरत जहान, एडमिसन तथा मार्केटिङ निर्देशक अबिद हुसेन अन्सारी, उप-प्राचार्य डा. रविशंकर गुप्ता तथा नेशनल मेडिकल कलेज नर्सिङ क्याम्पसकी उप-प्राचार्य प्रा. डा. बबिता सिंहलगायतको उल्लेखनीय उपस्थिति रहेको थियो।
समापन समारोहमा सहभागीहरूले तालिमबाट प्राप्त अनुभव, सिकाइ तथा व्यावसायिक अभ्यासमा यसको उपयोगिताबारे आफ्नो धारणा व्यक्त गरेका थिए। वक्ताहरूले यस्ता फ्याकल्टी डेभलपमेन्ट कार्यक्रमले आधुनिक शिक्षण विधिको प्रभावकारी प्रयोग, विद्यार्थी मूल्याङ्कन प्रणालीको सुधार, अनुसन्धान संस्कृतिको प्रवर्द्धन तथा शिक्षकहरूको व्यावसायिक दक्षता अभिवृद्धिमा महत्वपूर्ण योगदान पुग्ने विश्वास व्यक्त गरे।
प्रमुख अतिथि प्रा. डा. जैनुद्दीन अन्सारीले संस्थाले शैक्षिक उत्कृष्टतालाई थप मजबुत बनाउन यस्ता क्षमता विकाससम्बन्धी कार्यक्रमलाई आगामी दिनमा पनि निरन्तरता दिने प्रतिबद्धता व्यक्त गर्दै सम्पूर्ण प्रशिक्षक तथा प्रशिक्षार्थीप्रति आभार व्यक्त गर्नुभयो।
कार्यक्रमको अवसरमा तालिम सफलतापूर्वक सम्पन्न गरेका सहभागीहरूलाई प्रमुख अतिथि तथा विशिष्ट अतिथिहरूद्वारा प्रमाणपत्र वितरण गरिएको थियो। समापनमा उप-प्राचार्य डा. रविशंकर गुप्ताले धन्यवाद ज्ञापन गर्दै कार्यक्रम औपचारिक रूपमा सम्पन्न भएको घोषणा गर्नुभयो।
छ दिनसम्म सञ्चालन भएको उक्त तालिममा चिकित्सा शिक्षासँग सम्बन्धित विविध विषयमा अनुभवी विशेषज्ञहरूले सहजीकरण गरेका थिए। तालिमले सहभागी शिक्षकहरूको ज्ञान, सीप, शिक्षण क्षमता तथा व्यावसायिक दक्षतामा सकारात्मक र प्रभावकारी अभिवृद्धि भएको विश्वास व्यक्त गरिएको छ।
