काठमाडौं,१८ असार । सम्पत्ति शुद्धीकरणसम्बन्धी मुद्दामा अनुसन्धानका लागि पक्राउ परेका नेकपा (एमाले)का उपाध्यक्ष तथा पूर्वअर्थमन्त्री विष्णु पौडेललाई विशेष अदालतले थप ६ दिन हिरासतमा राखेर अनुसन्धान गर्न अनुमति दिएको छ।
विशेष अदालतका न्यायाधीश हेमन्त रावल, डिल्लीरत्न श्रेष्ठ र उमेश कोइरालाको संयुक्त इजलासले बुधबार तेस्रोपटक म्याद थप गर्ने आदेश दिएको हो।
पौडेललाई सम्पत्ति शुद्धीकरण अनुसन्धान विभागले असार ८ गते सुर्खेतबाट पक्राउ गरेको थियो। विभागले उनको सेयर कारोबार, आयस्रोत तथा सम्पत्तिको स्रोतबारे शंका उत्पन्न भएपछि विस्तृत अनुसन्धानका लागि नियन्त्रणमा लिएको जनाएको छ।
यसअघि पनि विशेष अदालतले दुईपटक म्याद थप गर्दै अनुसन्धानलाई निरन्तरता दिन अनुमति दिएको थियो। पछिल्लो आदेशसँगै विभागले अब थप ६ दिनसम्म उनीमाथि सम्पत्ति शुद्धीकरणसम्बन्धी अनुसन्धान अघि बढाउने भएको छ।
