काठमाडौँ– पेनाल्टी सुटआउटमा कोलम्बियालाई ४–३ गोलले पराजित गर्दै स्विट्जरल्यान्ड फिफा विश्वकप फुटबल २०२६ को क्वार्टरफाइनलमा प्रवेश गरेको छ।
क्यानडाको बिसी प्लेस, भ्यानकुभरमा आज बिहान सम्पन्न अन्तिम–१६ को प्रतिस्पर्धामा निर्धारित ९० मिनेट र त्यसपछि थपिएको ३० मिनेटको अतिरिक्त समयमा दुवै टोलीबाट कुनै गोल हुन सकेन। त्यसपछि खेलको निर्णय पेनाल्टी सुटआउटबाट गरिएको थियो।
पेनाल्टीमा स्विट्जरल्यान्डका ग्रानिट जाका, जेकी आम्दोनी, सेड्रिक इटेन र रुबेन वर्गासले सफल प्रहार गरे। कोलम्बियाका तर्फबाट जुआन क्विन्टेरो, जामिन्टन क्याम्पाज र लुइस डियाजले गोल गरे पनि त्यो टोलीलाई जित दिलाउन पर्याप्त भएन।
यस जितसँगै १३औँ पटक विश्वकप खेलिरहेको स्विट्जरल्यान्ड चौथोपटक क्वार्टरफाइनलमा पुगेको हो। यसअघि उसले सन् १९३४, १९३८ र १९५४ मा अन्तिम आठको यात्रा तय गरेको थियो। त्यसपछि भने स्विट्जरल्यान्ड समूह चरण वा अन्तिम–१६ बाटै बाहिरिँदै आएको थियो।
अब स्विट्जरल्यान्डले सेमिफाइनल प्रवेशका लागि आइतबार साविक विश्वविजेता अर्जेन्टिनासँग प्रतिस्पर्धा गर्नेछ।
