काठमाडौं,२८ असार । कतारका पूर्व अमिर तथा वर्तमान अमिर शेख तामिम बिन हमद अल थानीका पिता शेख खलिफा बिन हमद अल थानीको ८४ वर्षको उमेरमा निधन भएको छ।
कतारको शाही कार्यालय अमिरी दिवानले आइतबार विज्ञप्ति जारी गर्दै पूर्व अमिर शेख खलिफाको निधन भएको पुष्टि गरेको हो। विज्ञप्तिमा उनलाई राष्ट्रको विकासमा महत्वपूर्ण योगदान पुर्याएका नेताका रूपमा स्मरण गर्दै श्रद्धाञ्जली अर्पण गरिएको छ।
पूर्व अमिरको निधनप्रति शोक व्यक्त गर्दै वर्तमान अमिर शेख तामिम बिन हमद अल थानीले देशभर तीन दिन राष्ट्रिय शोक घोषणा गरेका छन्। शोक अवधिभर राष्ट्रिय झण्डा आधा झुकाइने जनाइएको छ।
शेख खलिफा बिन हमद अल थानीले सन् १९७२ देखि १९९५ सम्म कतारको नेतृत्व गरेका थिए। उनको कार्यकाललाई आधुनिक कतारको आर्थिक, प्रशासनिक र पूर्वाधार विकासको आधार निर्माण भएको समयका रूपमा हेरिन्छ।
