काठमाडौं,२८ असार । कतारका पूर्व अमिर (राष्ट्राध्यक्ष) तथा आधुनिक कतारका प्रमुख निर्माता मानिने शेख हमद बिन खलिफा अल थानी को ७४ वर्षको उमेरमा निधन भएको छ।
कतारको राजकीय अदालत अमिरी दिवान ले आइतबार (१२ जुलाई २०२६) जारी गरेको आधिकारिक विज्ञप्तिमार्फत उनको निधनको पुष्टि गरेको हो। विज्ञप्तिमा उनलाई राष्ट्रको विकास र समृद्धिका लागि अतुलनीय योगदान पुर्याउने दूरदर्शी नेताका रूपमा स्मरण गर्दै उनको निधनले कतारले एक ऐतिहासिक व्यक्तित्व गुमाएको उल्लेख गरिएको छ।
कतारमा “फादर अमिर” (पिता अमिर) को सम्मानजनक उपाधिले परिचित शेख हमदले सन् १९९५ देखि २०१३ सम्म देशको नेतृत्व गरेका थिए। उनको नेतृत्वकाललाई कतारको तीव्र आर्थिक, सामाजिक र अन्तर्राष्ट्रिय रूपान्तरणको युगका रूपमा लिइन्छ।
उनकै शासनकालमा कतारले तरल प्राकृतिक ग्यास (एलएनजी) उद्योगलाई विश्वस्तरमा विस्तार गर्दै आर्थिक समृद्धिको नयाँ उचाइ हासिल गरेको थियो। साथै, उनले अन्तर्राष्ट्रिय सञ्चारमाध्यम अल जजिरा नेटवर्कको स्थापना गरी कतारलाई विश्व सञ्चार क्षेत्रमा स्थापित गराएका थिए।
शेख हमदको नेतृत्वमा कतारले अन्तर्राष्ट्रिय कूटनीति, वैदेशिक लगानी तथा खेलकुद क्षेत्रमा पनि उल्लेखनीय पहिचान बनायो। विशेषगरी, सन् २०२२ को फिफा विश्वकप आयोजना गर्ने अधिकार प्राप्त गर्नुमा उनको दूरदर्शी नेतृत्वलाई महत्वपूर्ण मानिन्छ।
राजनीतिक संस्कृतिमा नयाँ उदाहरण प्रस्तुत गर्दै उनले सन् २०१३ मा स्वेच्छाले सत्ता त्याग गरी आफ्ना छोरा तथा वर्तमान अमिर शेख तमिम बिन हमद अल थानी लाई शासनको जिम्मेवारी हस्तान्तरण गरेका थिए।
उनको निधनप्रति कतारका नागरिकसहित विश्वभरका विभिन्न मुलुकका नेता तथा उच्च अधिकारीहरूले गहिरो दुःख व्यक्त गर्दै श्रद्धाञ्जली अर्पण गरिरहेका छन्।
