काठमाडौं,०३ साउन । काठमाडौंको टेकुस्थित फोहरमैला संकलन केन्द्र नजिक लागुऔषध नियन्त्रणका लागि खटिएको प्रहरी टोली र संदिग्ध कारोबारीबीच भएको झडपका क्रममा गोली चलेको छ। घटनामा एक भारतीय नागरिक घाइते भएका छन् भने दुई जनालाई प्रहरीले पक्राउ गरेको छ।
नेपाल प्रहरीको लागुऔषध नियन्त्रण ब्युरोका अनुसार अवैध लागुऔषध कारोबार भइरहेको भन्ने गोप्य सूचनाका आधारमा प्रहरी टोली घटनास्थलमा पुगेको थियो। अपरेसनका क्रममा संदिग्ध व्यक्तिहरूले प्रहरीमाथि आक्रमणको प्रयास गरेपछि आत्मरक्षाका लागि गोली चलाउनुपरेको प्रारम्भिक जानकारी प्रहरीले दिएको छ।
गोली लागेर घाइते भएका भारतीय नागरिकलाई प्रहरीले नियन्त्रणमा लिएर तत्काल उपचारका लागि अस्पताल पठाएको छ। उनको स्वास्थ्य अवस्थाबारे विस्तृत विवरण सार्वजनिक गरिएको छैन।
घटनास्थलबाट प्रहरीले घाइतेसहित दुई जनालाई पक्राउ गरेको छ। उनीहरूमाथि लागुऔषध कारोबारमा संलग्नताको आशंकामा अनुसन्धान अघि बढाइएको प्रहरीले जनाएको छ।
घटनापछि टेकु क्षेत्रमा सुरक्षा व्यवस्था थप कडा पारिएको छ। प्रहरीले घटनाको सम्पूर्ण विवरण संकलन गर्दै गोली चल्नुपर्ने अवस्था कसरी सिर्जना भयो भन्ने विषयमा पनि अनुसन्धान जारी राखेको जनाएको छ।
