काठमाडौं,०४ साउन । अमेरिका र इरानबीच बढ्दो सैन्य तनावको असर अन्तरराष्ट्रिय वित्तीय बजारमा देखिन थालेको छ। मध्यपूर्वमा द्वन्द्व चर्किएसँगै सोमबार कच्चा तेलको मूल्य एक महिनायताकै उच्च स्तरमा पुगेको छ भने एसियाली सेयर बजारमा मिश्रित कारोबार भएको छ।
विश्वको करिब २० प्रतिशत समुद्री कच्चा तेल आपूर्ति हुने हर्मुज जलमार्गमा अवरोध आउन सक्ने आशंकाले तेल बजारमा दबाब बढेको हो। अमेरिकाले इरानी सैन्य संरचनामा थप आक्रमण गरेपछि इरानले खाडी क्षेत्रमा रहेका अमेरिकी तथा साझेदार मुलुकका सैन्य सम्पत्तिमाथि जवाफी कारबाही गरेको अन्तरराष्ट्रिय सञ्चारमाध्यमहरूले जनाएका छन्।
अन्तरराष्ट्रिय बजारमा ब्रेन्ट कच्चा तेलको मूल्य प्रतिब्यारेल ९१ अमेरिकी डलरभन्दा माथि पुगेको छ, जुन जुन ११ यताकै उच्च स्तर हो। यस्तै, अमेरिकी मापदण्ड वेस्ट टेक्सास इन्टरमिडिएट (डब्लुटीआई) को मूल्यमा पनि उल्लेख्य वृद्धि भएको छ। गत साताको अन्त्यमा दुवै सूचक चार प्रतिशतभन्दा बढीले बढेका थिए।
विश्लेषकहरूले तेलको मूल्य निरन्तर बढे विश्वव्यापी मुद्रास्फीति पुनः चर्किन सक्ने र प्रमुख केन्द्रीय बैंकहरूको ब्याजदर घटाउने योजनामा असर पर्न सक्ने चेतावनी दिएका छन्।
एसपीआई एसेट म्यानेजमेन्टका विश्लेषक स्टिफन इनेसका अनुसार भू–राजनीतिक जोखिमका कारण तेल महँगिए पनि अमेरिकी मुद्रास्फीति घट्दो क्रममा रहेकाले तत्काल ठूलो मुद्रास्फीति संकट आउने सम्भावना कम छ। तर, तेलको मूल्य लामो समयसम्म उच्च रहिरहे उपभोक्ताको खर्च घट्नुका साथै विश्व आर्थिक वृद्धिमा दबाब पर्न सक्ने उनको भनाइ छ।
यसैबीच, एसियाली सेयर बजारमा भने मिश्रित अवस्था देखिएको छ। चीनले अर्थतन्त्रलाई थप सहयोग गर्ने अपेक्षाले हङकङ र साङ्घाई बजारमा सुधार आएको छ। हङकङको प्रमुख सूचक दुई प्रतिशतभन्दा बढीले बढ्दा साङ्घाई कम्पोजिट १.३२ प्रतिशतले उकालो लागेको छ। ताइपेई, मनिला र सिङ्गापुरका बजार पनि सकारात्मक देखिएका छन्।
तर, अमेरिकी वाल स्ट्रिटका प्रमुख सूचकहरू ओरालो लागेपछि सियोल, सिड्नी र वेलिङ्टनका बजारमा लगानीकर्ता सतर्क देखिएका छन्। सुरक्षित लगानीको विकल्प मानिने सुनको मूल्य सामान्य घटेको छ भने चाँदीको मूल्यमा भने वृद्धि भएको अन्तरराष्ट्रिय बजारले जनाएको छ।
